LAWNG

LAWNG

Lawng hi vaukama a awm laiin a che sual ngailo. A chetsualna hmun chu tuiah a ni. A chetsual theih lohna hmun vaukama a awm lai in lawng tha leh tha lo a hriat theih loh. A chetsual theihna hmun tui a a awm chauh hian lawng tha leh thalo a hriat theih. Ringtu te hi Inkhawm lai chuan kan chesual ngailova, ringtu tha kan nih leh nih loh a hriat loh. Kan inkhawm loh lai ,thlemna tawh theihna hmuna kan awm lai hi ringtu tha kan nih leh nih loh hriatna a ni.

Vaukama lawng a awm tam zawk tlat chuan chesual lo mahse lawng tangkai tak a ni ngailo. Chetsual theihna hmun tuia a awm lai hi a tangkai hun a ni. Chhungkua, khawtlang leh ram tana hun nei tangkai hman lek lova, mahni kohhran rawngbawlna a hun kan hman tam lutuk chuan chesual lo mahila ringtu tha leh tangkai kan ni thei ngailo ang.

Lawng tha leh tangkai chuan tuifawn leh thilpui karah pawh him takin lawnga chuang te tum ram a thlenpui thei thin. Ringtu tha leh tangkai ni tur chuan thlemna tawhna hmunah pawh suala tlu lova chhungkua, khawtlang leh ram tana rinawm leh taima taka kan thawh a ngai.

Vaukama lawng a awm lai aiin tuia a awm laiin tawngtai nasat a ngai zawk ang hian Biakin ah chauh zaia Pathian chawimawi leh tawngtai a tawk lova, sual tura thlemna kan tawhna hmun kan nitin khawsakna hmunah kan nun dana Pathian chawimawi a, sual hneh tura chakna dila tawngtai tam a tul hle.

Kan rama sualna pun chhan ber hi lawng (ringtu) kan awm tamna hmun tur chhungkua, khawtlang leh ram tan thawk hman lo khawpa vaukam ( kohhran rawngbawlna hmun) a kan awm tam lutuk vang a ni thei a ngem? Ngaihtuah chian a va tha em!