HRINGNUN LAMTLUANG

HRINGNUN LAMTLUANG
Er. Chhungpuia Renthlei
Senior Technical Officer
NIELIT Aizawl

Hringnun par a vula a chuai leh si thin.Ni e, kan hring nun hi ‘Thawnthu bu’ a ni a, a ziaktu chu keimahni kan ni. Nitinin phek thar kan ziak a, thla tinin ‘Bung thar’ kan kai a, kan ziahna Pen chu kan nundan hi a ni a, midang ten min chhiar a, ziah fimkhur a ngai hle mai. Ringtu te hian hlim taka rawngbawlna hun tam zawk kan nei thin, kan vannei hle mai. Hetihlai hian kan hringnun hi thawnthu ang maia ngaihnawm, hlimawm, lungchhiat thlak, nuam leh hreawm inpawlh ani lawi si. Thawnthu tha chu a ngaihnawm tial tial a, bung khat chhiar hnuah bung hnih chhiar chakawm leh thin a, ngaihnawm ti takin kan chhiar chhuak thin ang hian kan hringnun nau neihna room atanga thlankhur thleng hian Pathian leh kan rawngbawlpui ten ngaihnawm ti taka min chhiar chhuah sak theih a va duhawm em!

Hring nun lamtluang chhuk cho leh kikawi tak taka ringtu te kan zinkual chhung hian Pathian rinna tak tak nen kan hringnun tawlailir kan khalh a tul hle. Rawngbawlna lamlianah chapona leh itsikna avanga rawngbawlpui te chirh dai per lovin, nihna leh chanvo duh luat avanga phurh zawh loh load la chiam lovin, phur luat avanga kohran kal pela speed sang taka tlan chiam bawk hek lovin, rawngbawlna kawngpui Road sign Bible, kohhran thurin leh kaihhruaina zawm hram hram ang u. Ringtu te hringnun traffic hotu ber Isua Krista leh a kohhran inkaihhruaina kawng dan kan zawm a, thlarau thianghlim petrol a kan thinlung kan thun khah bawk chuan kan rinna hringnun kawngah traffic a jam lo anga, kawng kan bo hek lo anga, mi zawng zawng hringnunah inremna a awm dawn si a. Isua en chunga hringnun lamtluang kan zawh zel hi a va hun tawh ve aw!

Hringnun khawvela kan cham chhung hian ringtu te zingah mi dang laka lan mawi, lansarh duh avanga a dera nun hi a lo awm theih meuh mai. Heng mite hringnun hian rah tha a chhuah lova, a rah chhun pawh sang takah a awma, tuman an ei pha ngai heklo. Midang te tana rah chhuah nun neih hi Pathianin kan ko a a nghah tlat avangin kan nitin nunah Pathian hre chungin rinna nghat ila; midang te tana rahchhuah nun nei tak tak turin tlawm zir ila, indah hniam fo ang u.Thei pawh a rah nasat chuan a kur hniam thin a, a rah chu miten an ei pha thin si a. Kohhran hruaitu leh mipuite kan rawngbawlpui leh chenpui te ei phak a kan rah kan chhuah hi a va duhawm em!

Hringnun khawvelah rinna hi vanram lem ziah theihna thlarau lam pencil a ni si a, rinna hi thil tih tello chuan a thi a ni tih kan bible in min hrilh thung. Chuvangin he khawvela hringnun kan hman mek lai hian rinna nung kan neih a pawimawh hle mai. Keini kohhran mipui te leh rawngbawltu te hian kan rinna hmanga vanram lem kan ziah hi Pathian leh kan rawngbawlpui te tan a fiahlo hle emaw, hremhmun lem a ang zawk lek lek thei tih te pawh kan ngaihtuah atul khawp mai.I lemziak eng ang nge ni ve le ? Hringnun lam tluang kan zawh thui ta e.“Kan hringnun a ral hunah setana hmel nilo, Isua hmel ngei kan hmuh theuh theih nan, Isua nen hringnun laichhuat chhir theuh ang u“  tiin he hringnun thuziak hmawr hi han suih bilhbawlawk phawt mai teh ang.