BIOLOGICAL CLOCK

BIOLOGICAL CLOCK
Er. Chhungpuia Renthlei
Senior Technical Officer ,NIELIT Aizawl

Mak tak mai chu Pathian hian a thilsiam nunna nei zawng zawngah  ngawi renga hun bi nei taka taksa peng thununtu Sana rinawm tak Biological Clock dah a Tuma hrilh leh thupek miah lohvin khawvar dawnah ar a khuang a, Lo sul haw hunah thereng a hram thin.Nipui emaw, thlasik inherchhuah dawn apiangin ransa te an pem thin.Tui takinzanah  kan muhil a. zing khua a lo vara kan lo harh leh mai thin.

Enge Biological Clock chu?

Biological Clock chu thil siam nunna nei taksa peng hrang hrang hnathawh dan hun bi thliah (timing system) fel tak nena thununtu a ni. Mihring te hian Biological Clock ang khat kan nei vek a, kum a zir te, chenna environment leh nitin nunphung te hian a hnathawh dan a tidanglam thin. Biological clock hi chi hrang tam tak kan nei a,  chi thumah then a ni. 1. Master Clock: Pakhat kan nei.Thluak chhunga Chhia leh tha hriatna thununtu ber Suprachiasmatic Nucleus (SCN) ah a awm. Kan taksa a clock zawng zawng a thunun. 2. Peripheral Clocks:12 vel kan nei. Kan taksa peng (liver, heart, pancreas, kidney, etc.) ah a awm vek a, an hnathawh dan an thunun. 3. Cellular Clocks: maktaduai tam tak kan nei. Kan tisa mur(Cell) tinah an awm a, cell siamrem, leh than dan an thunun.

Biological Clock hnathawh dan leh tangkaina: 

Biological clock hrang hrang te hian rual khai taka an mahni timing theuha kan taksa tha taka an thunun chuan mut tuina, rilru sawrbingna, rilru zangkhaina, than thatna leh hriselna thakan nei thei.A hun leh hmun azirin rang takin kan taksa a insiamrem thei bawk. Clock timing inher chhuah (Cycle) rei zawng leh kan taksa an thunun dan zirin chi 4 ah an then a, chung te chu:  

1. Circadian Rhythms: Kan biological clock pui ber (Master clock) a ni. Darkar 24 dan zelah kan chenna lei vir dan (day–night cycle) milin mut leh thawh hun (Sleep–wake cycle), taksa temparature leh taksa harhvanna leh tuanrang zawng, taksa chhe lai siamthat, than tir leh kan rilru puthmang (hlimna, lungngaihna, thinrimna) thununtu ber a ni.

2.Infradian Rhythms: Zawi muang raihin weekly, monthly, seasonally in a inherchhuak thin. Hun bi fel tak nen inthlahchhawnna lam(Menstrual cycle) thununtu leh sik leh sa (nipui, thlasik, fur) mila mihring rilru put hmang thununtu a ni.   

3.Ultradian Rhythms: Kan taksa hnathawh dan hrang hrang Lungphu leh thawk ran zawng, riltam leh chaw paitawih hun, leh mut hun englai pawhin thunun.Taksa peng hnathawh short-term balance enkawltu a ni. Nikhat chhung lek pawhin vawi tam tak a inherchhuak.

4.Circannual Rhythms: Kum khatah vawi khat a inher chhuak. Sik leh sa inthlak leh awmna hmun (Time zone) inthlak azir zela kan taksa dan leh rilru put hmang(Mood) thununtu a ni.

Biological clock zingah Circadian Rhythms hi kan hriat lar ber leh kan taksa clock dang zawng zawng thununtu ber a ni. Kan mit(eye) atangin eng leh thim signal a dawng a, hemi mil hian kan taksa a thunun thin. Khua a lo thim hian sleep hormone a ti pung a, mut a chhuak a, kan muhil thin. Khua a lo var hian eng(light) signal a lo dawng a, mutchhuahna(Sleep hormone) ti tlem tur turin in thluak a hrilh a, kan thluak a lo harh vanga, kaihthawh chawp ngailovin kan tho mai thin. Mi pangngai chu biological clock in a kaithova. Mi thatchhia leh mawl erawh chu chhungten an kaitho thin an ti. 

Kan tunlai nun danin Biological Clock a chawk buai:

Thiamna a pung chho zela, hmanraw tha zawk a rawn chhuak a. Heng te hian kan nunphung leh hnathawh dan leh chaw ei hun nasa takin a her danglam a. Information Technology (IT), Social media leh Artificial Intelligence (AI) in min chim hnuah phei chuan kan biological clock pawhin mumal takin hna a thawk thei meuh ta lo. Zing ni chhuakin min kaitho zo tawh lo a, zan thimin kan mut a tichhuak hek lo. Smartphone leh tablet screen  hmangin naupang kan awm tlei a, thalai ten zan rei tak thlengin phone leh computer kan khawih a, puitling te pawh WhatsApp message vangin  zan rei tak thlengin kan meng a, Kum upa te pawh TV leh Mobile vangin hma takah an muhil thei bik tawh lo a, zan rei ah Phone call in a kai harh fo bawk. Ngawi renga chhungril lam atanga hun bi awmze nei taka min thununtu Biological clock hian thil tih theihna a nei tlem tial tial ta. 

Harsatna a thlen te:

Taksa thunun theilo khawpa Biological Clock tihbuai anih chuan rilu leh taksa ah harsatna tam tak thlen thei. Zan hmut hun leh zing thawh a tibuai a, zing kan tho lai a, nilengin kan nguai. Zirlai te class ah an har vang theilo a,uluk takin an ngaihtuah theilo. Taksa a thang tha theilo a, Taksa chak lohna leh hrisel lohna hrang hrang an nei thin. High school leh college a zirlaite dam loh vanga Casual Leave dil tam zia atang hian kan hrethiam mai awm e. Harh vang tak tura ngaih te pawh an nguai a, an inthlahdah viau thin bawk.  Kan thatchhe tulh tulh a, kan nih tur ang kan ni phak ta lo a ni ber e.

Inven dan:

A pawimawh ber chu hun bi mumal taka mut leh thawh a ni. Zan men rei loh leh thawh hma a tul a, dar 10 aia tlai lova mut leh zing dar 6 aia tlai lova thawh te, hun bi mumal taka mut leh thawh te, tui in leh chaw ei hi kan biological clock mila khawsak dan pawimawh tak a ni. Darkar 24 chhung a kan taksa eng leh thim balance taka dawn tir a tul. Zan lama Phone/Computer te hi night mode dah a tha.Mut dawna  Bedroom light off hi taksa tan a tha hle. Chhunah room chhunga inkhung reng lo va, boruak tha leh ni eng taksa dawn tir. Zingkara zing ni chhuak hmu hmana thawha regular taka exercise lak.

Naupangeh thalai nun chhiatna tam ber hi Biological Clock nena in millo lutuka technology hmanrua kan hman vang leh zan rei thleng awh tur program kan siam hnem lutuk vang a ni fo.Naupang awm tlei nan smartphone kan hmang sa te hi a thalo hle. An mit hian ni eng (Natural Light) aia screen eng a hmuh hnem lutuk chuan an biological Clock a buai a, taksa hrisel lohna leh rilru buaina an nei thei. Screen timing hi fel taka nitin control a pawimawh.

Tunlaiah thalai tan Internet, Social media leh mobile apps bakah entertainments, Sports leh kohhran hnuaia rawngbawlna peng hrang hrang te hi thil tha tak angin lang mahse, Biological Clock nen kan her mil loh chuan  kan mut leh thawh hun tibuaitu, kan hriselna tichhetu, chhungkaw lungrualna tichhetu leh kan future career thleng ti chhetu a ni thei. Mi mal, chhungkua leh khawtlang siamthatna hi kan biological clock mila kan khawsak leh khawsak lohah a innghat thui hle.Pathianin mihring te hnena a chhia leh tha hriatna thununtu min pek hlu tak Biological Clock hi kan hriselna leh damreina hnukpui anih miau avangin hlam chhiah lova, kan taksa tha taka a thunun theih tura kan insiamrem a tul hle.