GOOGLE PLAY STORE
(Bihchianna)
Er. Chhungpuia Renthlei
Senior Technical Officer, NIELIT Aizawl
A lo pian dan:
Google Play Store hi Google official digital distribution platform lian tak mai, Android leh ChromeOS devices (Smart phone, Tablet, TV, Camera, computer e.t.c) hmangtu te tana software download na hmunpui ber a ni. A tirah chuan mobile apps tlem te chauh an dah a, a hming pawh Android Market a ni. October 22, 2008 khan Android smartphone TC Dream ( T-Mobile G1)ah a hmasa ber atan an install a. Kum 2012 kum tir khan Android Market chu an upgrade a, software application mai bakah games, productivity tools, educational software, entertainment apps leh digital content hrang hrang (movies, TV shows, eBooks, leh audiobooks) thahnem tak an chhung khawm a. Google Play tiin a hming an thlak bawk.Tichuan, March 6, 2012 khan tuna kan hmelhriat Google Play Store chu a rawn piang ta.
July 24, 2013 ah Google Play Games an dah a, May 2015 ah naupang tan Family section an siam leh a.Android hmangtu te tan mimal, company leh sorkar deptt. ten apps thahnem tak an dah a, may 2016 khan category hrang hranga apps leh games tha zual te tan Google Play Awards hmasa ber an siam bawk. Kum 2017 atang khan sum hailuh nan subscription services (Advertisements) an dah a, a design pawh an upgrade bawk. Mobile hmangtu te tan erawh ads tam lutuk hian harsatna a thlen nasa thin hle. September 23, 2019 khan ads or in-app purchases tellova kan mamawh kan hman theih nan Google Play Pass (subscription-based service ) an tlangzarh leh ta.
Hmasawnna
Google chuan play store hmanga an sumdawnna hlawk tak chu ram hrang hrang 190 laiah an zarpharh a, thlatin mobile apps tam tak upload a ni a, venhimna tha tak Play Protect security feature a nei a, regular takin an update thin.Tunah chuan khawvela Mobile phone application downloadna hmunpui lian tak leh tlawhtu ngah ber a ni hial mai.Tunah chuan digital payment methods Credit/ debit cards. Gift cards, Google Pay. PayPal. leh Carrier billing a support bawk.Kum 2020 chho vela COVID-19 pandemic hun lai khan mi tam takin zirna, hnathawhna leh entertainment atan mobile apps kan hman nasat em avangin Google Play app downloads leh revenue a vawrh sang hle. Kum 2021 khan user data collection leh privacy practices chung changah Policy an update leh a. March 6, 2022 khan ropui takin 10-Year Anniversary an lawm a. Nikum 2023 khan Artificial intelligent features an telh belh leh a. Kan mamawh tur software min rawn hrilh thei a, tawng hrang hranga review theihna a awm ta bawk.
Kumin 2024 ah ringawt pawh hmasawnna tam tak a awm bawk. April 3, 2024 khan Google chuan data control nan new account deletion requirements a siam a. Software upload tu (Devcelopers) te fill up tur Data Safety form an siam a. May 31, 2024 thleng an hawng a. May 2024 khan app searching and discoverability chak zawk an dah a. July 17, 2024 khan policy thar Health Connect permissions August 31, 2024 atanga hman tur an siam leh bawk a. Khawvel mipui smart phone tam ber te hi Android Operating system hmang an ni bawk nen, Google company chuan mobile software sumdawnna chu a duh ang angin a thunun a ni ber mai.
Google play store atanga software siamtu ten an software an hralhna man 30% hi Google ten an lo commission thin. A te tham deuhah chuan 15% a ni thung. Kum 2023 khan App purchases, subscriptions leh in-app advertisements atang ringawtin $50 Billion (Rs 4,23,34,00,000) a lalut. Software leitu te tan rewards(Google Play Points) an siam a. Hei hi apps discount nan emaw, mi harsa te tanpui nan an hmang thin. kum 2024 a rawn inher meuh chuan ram 190 zetah a inzarpharha a, 3.5 million apps lai upload a ni a, Khawvela mobile apps sumdawnna lian ber, software awm tam berna, tlawhtu leh download tu ngah ber a rawn ni chho ta a ni a ni.
Buaina:
Software dang te ang bawkin security a nei famkim biklo a, harsatna a nei ve reng thin. September 2015 khan BrainTest Apps chuan 1 million Android devices lai ah malware a thehdarh. March 2020 khan Tekya Malware in 1 million devices lai a khawih chhe bawk. July 2021 khan Facebook Credential Theft (Fb loggin id leh password rukchhuahna) virus te, GriftHorse Trojan, leh Banking Trojan Droppers ten a tibuai bawk. May 2023 khan 100 million users data khawih ching pen a ni. Kumin October 2024 khan Virus kai Apps tam tak thehdarh a ni bawk. Kumin hian Play Store apps mi 8 million ten download ah virus kai apps 200 hmuhchhuah a ni tawh. An hriatchhuah veleh play store atangin an paih nghal zel a ni.
Sumdawnna hlawk tak a ni tih hria in Amazon Appstore, APKPure, F-Droid, Aptoide, Samsung Galaxy Store e.t.c te an rawn piang a. Google chuan el pui tam tak a nei tihna a nih ber chu. Heng company te hian digital distribution atan google platform an hmang ve duh si a. Mahse, google in security khauh tak a siam avangin an duhthusam permission an nei thei lova harsatna an tawk nasa hle. Google Platform chhunga duh zalen taka an app catalog an control ve theih nan te, mipui ten play store atang chauh nilo, heng third pary apps store atanga kan duh ang kan install thei ve nan leh company ah inelna tha zawk a awm theih nan federal judge ah an zualko ta a.
October 7, 2024 khan federal judge chuan third-party app stores te ngenna angin playstore her danglam turin Google thu a pe ta rup mai. He thupek hi google in a duh ang anga platform a thununna tih tlem tumna a ni. A tirah chuan November 1, 2024 thleng hun an pe a. Mahse, November 27, 2024 khan Google chuan U.S.Circuit Court ah Appeals a thehlut vangin court thupek chu an suspend leh ta hrih a Hei hian Android platform atanga lei theih leh play theih tura Microsoft Xbox games, Epic Games, Aptoide apps sore leh APKPure a tikhaih lak hle. Keini mipui tan chuan company in el se, products tha zawk leh man tlawm zawk kan thlang thei dawn a, thil tha tak niin alang. Eng pawh nise, Google's appeal hi court in a ngaihtuah anga, thu tlukna an siam thuaiin a rinawm.
){kind=link}
0 Comments