Er. Chhungpuia Renthlei
Senior Technical Officer, NIELIT Aizawl
Trolling awmzia ber chu tum lawksa vang hrim hrima mimal emaw, community tana message huatthlala tak leh thin ti ur thei post hi a ni. Inhnialna chawkchhuak thei mimal inbeihna leh tawngkam chaltlai tak tak te hi a huam vek a ni. Social media platforms hrang hrang -WhatsApp, Instagram, Snapchat, Facebook,Twitter, YouTube, online forums, chat rooms e.t.c ah trolling hmuh tur a tam thin hle mai.
Troller te hian an thil post reaction an thlithlai reng a, inhnialna an tihchhuah leh mimal rilru hah taka an siam te chu an lo hlimpui ve thung thin. Online communities ah inhnial buaina an chawkchhuak a, inhalna leh innghirnghona a thlen thei a. A bikin diriam leh zahpah lo taka mimal an beih phei chuan an zahawmna a tibawrhbang thei a, rilru hreawm leh mangang taka siam in depression vangin mahni intihhlum duhna hial a thleng thei. Social community a inlan ngamlo khawpin an siam thei bawk.
Trolling leh keini:
Social media a mi thu post te, an thlalak leh profile te ngeiawm takin kan troll a. India dan in zalenna min pek Right to Freedom of speech/ Expression chang chawia aia upa zahna a awm lo a, rilru na taka midang siam turin tawngkam huat thlala leh ngeiawm tak tak a kan in troll te hi a pawi hle. Political party inbeihnaah ngat phei chuan ringlo mi te aiin kan nasa hle. Social media insawiselna na leh deuhsawhna atan te, mi thenkhat thil tih a chhe zawnga chhuahnana hman kan tum hram thin te hian kan moral chhiatzia a lantir chiang hle. Finfiahna mumal awm silo a intihhmingchhiat theihna tur thu leh milem post darh ching te, midang zahawmna leh inlaichinna tichhe zawnga social media kaltlanga thu diklo vawrh darh tute hian hnam, sakhua/kohhran, political party leh thian karah inhuatna a thlen fo thin bawk.
Trolling hrem theihna dan te:
Social media a topic thenkhatah a thlawp zawng leh a kalh zawnga ngaihdan in anglo tak tak hmanga kan han inhnial bap bap te, mi thenkhat thu post kan lo hnial satliah te hi crime a tling lem lo. Mahse, thudikllo hmanga intihhmingchhiatna te, rilru mangang khawpa invauna te leh zahawmna tihbawrh banna hial a thlen chuan Crime a tling thin.
India ramah hian trolling hremna dan abik taka siam awm lo mahse, I.T. Amendment Act 2008 section 67 & 67A hmanga hrem theih an ni. IPC section 499 a tarlan danin Social media a midang tihmualpho theihna zahmawh rawngkai Photo/Video post darh hi kum 2 thleng jail tan theihna a ni. IPC section 503 a tarlan danin hmeichhe zahawmna tihbawrhban leh vau beh hi hrem theih a ni a, online/ Offline inbiakna hrang hrang hmanga hmeichhe rilru mangang a siam a vau hi IPC section 507 hmanga hrem theih a ni.
Hriattur pawimawh te:
Trolling vanga harsatna tawk ten cybercrime police station hnai berah report emaw, cybercrime.gov.in ah online complaint thehluh theih a ni. Complaint laia Evidience atan submit tur trolling na URL, contents, pictures, comments, messages, profile e.t.c screen shots tur. Hard copy leh soft copy dahthat tur. Trolling titu rinhlelh mobile number leh personal detail chhinchhiah bawk tur. Thil tul dang a awm chuan cybercrime police station ten an hrilh ang che.
Online a kan thil post te hi min troll nan an hman thin avang hian kan mualpho theihna photo & Video post loh hi a tha hle mai. Public a thil post chiam chiam hi a him lo a, post siam dawn reng rengin restriction setting mumal tak neih a tha. Mimal a min troll tu te hi chhang let lo lova, block mai zawk tur a ni. Social media ah phei chuan thinrim taka chhang lo va, insum hram hram a pawimawh hle.
0 Comments