SIM Technology chhuak thar ber
Er. Chhungpuia Renthlei
Senior Technical Officer, NIELIT Aizawl
Electronics khawvelah nitin deuh thaw hmasawnna thar a rawn piang a, Abik takin Mobile communication lamah pawh hmasawnna a chak hle a, chung zingah chuan smartphone system components design hi langsar tak pakhat a ni awm e. Tunhma Mobile handset an siam tirh khan a hranpain SIM Card a awm lo a. A hnuah Bank Credit card tia zet mai SIM Card an siamchhuak a, Computer a CDROM Drive ang maiin duh hun hunah handsetah an thlawnin an vuah thei a. A awlsam hle. Amaherawh chu SIM Card sized lian lutuk chuan harsatna tam tak a siam a, Kum 1996 chho ah SIM Card te zawk Mini SIM(25mm x 15mm) leh kum 2003 chho ah Micro SIM 15mm x 12mm) an rawn siam leh a. Kum 2015 vel thleng khan kan hmanga. Kum 2012 chho ah SIM te tak te kutzung te tia lek Nano SIM (12.3mm x 8.8mm) an rawn siam leh a, hei hi vawiin thlenga kan SIM Card hman hi a ni.
Enge iSIM chu le?
iSIM chu Integrated SIM tihna a ni. A hranpa a SIM chip siam lovin Smartphone system components (Processor) te nen chips hlawm khatah ah an chhunfin(integrate) nghal vek a ni. eSIM nena an in an lohna chu eSIMah chuan SIM chips(IC) te reuh te a hranpa in an siam a, Smartphone System boardah an vuah a, thlawn theih tawh loh turin an solder a. iSIM erawh chuan eSIM angin SIM Card Chips components a hranpa in a nei tawhlo. Smartphone board architecture ah an telh nghal vek ti ila kan hrethiam mai awm e.
Hei ringawt pawh hi a that tawh tehreng nen, Smartphone System components design an tidanglam leh a, iSIM(Integrated) ah phei hi chuan a hranpa a SIM chips awm tawh miah lovin processor nen chips pakhatah an chhung khawm hmiah mai. Hetiang anih takah chuan eSIM(embedded SIM) ai daihin hmun a awh tlem a, Mobile phone mai bakah electronics hmanrawn hrang hrangah vuah a awlsam hle dawn tihna a ni.
Engvangin nge iSIM an siam?
Direct a System component nen thlunzawm anih loh vang hian harsatna tam tak a awm avangin SIM tray hi tihbo tumin hma an la char char a, tichuan kum 2016 chho ah khan 6mmX9mm size eSIM an rawn duangchhuak a. Kum 2017 chho atang khan hman tan a ni tawh a, Mobile handset company te pawhin a support thei tur an siam nual tawh bawk. Kum 2017 hnulamah a aia te daih zawk milimeter khat pawh tling lo a te iSIM an rawn siamchhuak leh a. Hei hi SIM chhuak thar ber a ni ala hrih. iSIM erawh hi chu tuna thuziah lai mek April 2024 thleng hian a mil tur handset an la siamchhuak hrihlo thung.
iSIM that bikna te enge ni?
SIM tray angailo a, a hranpa in SIM component a awm tawh lo a, System boardah components dan te nen Chip pakkhatah belhbawm nghal vek a ni. System board size a ti te a, power a heh lo a, a man a tlawm phah bawk. Tuna SIM kan hman lai anga, tihbo, tihchhiat leh rukbo theih ani lo a, a him hle a ni. SIM trays,SIM cards leh eSIM chips a hranpa in a awm tawh lo.SIM pangngaiah hian carrier thlak theih anilo a. Airtel SIM chu Airtel a ni reng ang. iSIM ah chuan kan duh hun hunah kan thlak thei thung. SIM Card neih teuh angailo tihna ani. Tin, iSIM hmang hian real-time tracking leh monitoring a tih theih a, hei hi thatna pakhat a ni bawk.Nakin zelah network tha zawk leh rintlak zawk kan neihna tura thil tangkai leh pawimawh tak a ni dawn bawk.
Awle, Electronics khawvelah nitin deuh thaw hmasawnna thar a rawn piang a, Hmanraw changkang tak tak a rawn chhuak a, kan neih ve meuh tawh hi chuan a aia thar a rawn chhuak hman leh tawh thin. iSIM hi technology thar a tak taka hman theih theih a la nilo mahse, hmanraw design size te leh thil ti thei tak mamawhna Internet of Things (IoT) sectorah kan khawsak tawh avangin thil pawimawh tak a ni. eSIM support phone neih kan uar hunah meuh chuan iSIM support the smartphone pawh a rawn chhuak ve leh mahna le.iSIM pawh hi an la rawn design tha leh lovang tih kan sawi theilo. Engpawh nise, tuna i hman mek SIM Card kha uluk takin lo hmang zel phawt teh le!
){kind=link}
0 Comments