KUMHLUI - KUMTHAR

KUMHLUI - KUMTHAR
-Er. Chhungpuia Renthlei

 

Pathian hruaina in Kumthar 2024 kan lo chuangkai leh ta der mai! A hmasa berin chhiartu zawng zawngte suih loh kumthar chibai ka buk a che u. Kum a lo thar apiang hian Kumhlui ngaiin "Hun kal ta zawng zamual pui an liam zova, nunhlui an chang ta. Kumhlui, aw Kumhlui kan ti vawng vawng.." tiin lungleng takin kan indawm kun thin. Kumhlui ngaih lunglên a awm leh tawh ngai lohna Chatuan Ram kan thlen hunah erawh zawng, Kumhlui ngaih lunglên a awm tawh lovang.

Khawvel zin kawng bul kan tan atanga kan thihni thlenga Lungngaihna leh Hlimna, Hlawhchhamna leh Hlawhtlinna, Bawrhsawmna leh Hriselna hun min chhiar sak turin Khuanu hian sana a zawnga sana rinawm ber leh mitin mil tur Hringnun Sana min buntir vek a. Kan Lal Isua zirtir zah zet thla bi kan chhiar zawh meuh chuan, ni leh thla te kan nguihban a. Hlim takin Happy New Year tiin Kumthar duhsakna kan inhlan thin. Hetiang reng reng hian lei miten hun leh ni kan chhiar kumhlun thin. "Kumhlui, Kumhlui, ngaih awm zaiin ka au a che. Kan nun hlui leh thil tih zawng te Zamual i liampui ta; Kan ngai che lo kir leh rawh " han ti thin mahila, Hringnun Sana hi hma lam panin a vir reng a, auh din zawh rual a ni silo.

Kumtharah hian kan nungchang leh thil tih hmangtein eng nge kan hlawhchhuah ang? tih ngaihtuah a pawimawh khawp mai. Kumhlui a kan hun hman dante kha thlir kir ta ila, kalsan ngai, hlih thlak tur leh thlah liam tur kan nunah kan nei ṭheuh ngei ang. Kan tihfuh loh leh tihnawn loh chi te chhinchhiahin awmze nei zawka hma thar lak i tum theuh ang u.Thil thar chhuak tur chuan kan nu hlui a thil tha lo te hi kan thlah liam phal a ṭul ṭhin. Prime Minister, Narendra Modi khuan “Mi ropui nih tum lovin, thil ropui tih tum zawk rawh u," a ti roh pek a. A sawi dik viau mai. Engkim mai hi hlawh chhuah a lo ni vek tlat mai.

He kumthar han engnge min rawn thlen dawn kan hre hauh lo. Kan hmaah hian harsatna nasa takin min hmuak pawh a ni thei e. Chuvangin englai pawha Lalpa tawk tura inpeih atul hle. Pathian chakna rinchhanlo chuan kan ding zo lovang. Pathian engkimtithei, engkim hria, khawikipa awm, chuan min thlir reng dawn a. A thu lovin engmah a thleng lovang tih hi ring ila. Amah rinchhan tlatin he kumthar hi i hmachhawn mawlh teh ang u. Amite chu buaina leh harsatna karah pawh vengin a awmpui zel dawn ani. Chuvang tak chuan a duhzawnga nung a, Amah kan hriat reng a tul tak meuh a ni.

Garber Murphy-a chuan, "Tunah leh nakinah khawvel hi engtiangin nge a awm zel dawn tih hrilhlawkna khawl chu tuna kan CHHUNGKUA theuh hi a ni" a ti. Mahni chhungkua khawsak dan tur rel fel hman lova thih hi nu leh pate tan thil pawi tak a ni. Pathian duhzawnga hma kan sawn zel theihna turin kan Chhungkua theuhvah bul tanin Pathian lalber sela, a tan maicham din thar leh ang u. Mahni chenpui chhûngte leh chhûngkhat lainate hmangaiha ngaihsak sawt tur te, kohhran thil a ni emaw, eng hna pawh thawk ila- thawhpui nuam ni sawt tur te, midangte hrethiama tanpuitu tha leh tangkai ni turin rilru siam thar ang u. He Kumthar lawmawm takah hian nangni Chhungkua enge in an le? Taksa leh Thlarauvah in dam tlang em?

Kan nundan leh khawsak dan azirin kum tha leh kum chhia kan neih thin avangin kumin 2024 hi kan tan kum tha leh duhawm, hlawhtlinna leh malsawmna dawn kum anih ngei theih nan, mimal leh khawtlangah hmasawnna thar kan hmuh theih nan rilru leh ngaihtuahna fim nen theih tawp ila. Engtik lai pawhin kan Hringnun Sana min bun tirtu Siamtu Pathian hriatpui tlaka hun vawng dik leh hmang tha leh zual tura ruahmanna fel tak siam hi ava tangkai dawn em!

Vaivuta siam hringfa te zingah  khualzinna khawvela kan cham chhung hian nunhlui ngailo reng kan awm mawlh lo a ni ber e. Kumhlui liam ta pawh kha thenkhat tan kum chhiat kum ani anga, thenkhat tan kum ngaihawm tak leh hriatreng tlak, engtik hunah maha theihnghilh tawh ngai loh tur a ni thung ngei ang.

Kumhlui liam ta khan kan hringnun a a duhawm lo lai te, a thalo lai te, theihnghilh kan duh ngawih ngawih lai te hi liampui vek se.He kumthar hian kan tan damna te, hriselna te, thatna te, lungawina te, hausakna te, malsawmna te, rawn thlen mawlh rawh se.