DP& AR SERVICE RULES (LDC POSTS) Vs. COMPUTER CERTIFICATE

 DP& AR SERVICE RULES (LDC POSTS) Vs. COMPUTER CERTIFICATE

Er. Chhungpuia Renthlei

Tun thla 10th February 2023 a Health  & Family Welfare hnuaia LDC post 2(pahnih) hna ruak advertisement ( Advertisement No. 1 of 2023) ah khan Computer thiamna neih turah "Diploma in Computer Application/ Certificate in Computer Application from institutions recognised by Mizoram State Council of Technical Education (MSCTE)" tih a nia. Hemi awmzia ber chu University MCA, BCA, AICTE ( ME,BE), MSCTE (Computer Sc.& Engineer)  hnawlin MSCTE in certifcate a pekchhuah Private computer zirna atanga zir te chauh LDC post atan mizoram sorkarin a pawm tihna a ni.

India ram chhungah University/Computer accredited course a hniam ber tanga Master degree thleng computer zirna tam tak a awm. Mizoramah pawh MZU hnuaiah BCA leh MCA zirna a awm a.National Institute of Electronics  & Information Technology (NIELIT) hnuaiah CCC, O Level, A-Level .e.tc a awm  bawk. Heng te hi University / Board  ten recognition an pek vek a ni. Tin, MSCTE hnuaiah Indian Council for Technical Education (AICTE) recognized in  Polytechnic ah Computer Science & Engineering  course awm bawk.

Heng zawng zawng hnawl a Certificate pakhat chauh sorkarin a pawm hi thil mak tak leh serious tak a ni. A bikin Computer lama Graduate leh Master degree nei tan phei chuan a lungawi thlak loh hle. Private computer zirna tam takah an thawk a, an zirlai ten LDC hna an dil theih laiin anni chuan an dil thei ve lo thung. Thil mak chhiar sen loh zinga chhiar  sen mak tak a tling hial awm e! 

Tunge mawhphurtu ber le?

A mawhphurtu ber chu Service Rules  siamtu DP&AR leh a changtu minister a ni. Mizoram Ministerial Service Rules, 2021, DP&AR in Notification a tih chhuah No. A-12018/31/2020-P&AR (GSW), SCHEDULE-III [Educational and other qualifications including age limit for direct recruitment] the 30th November, 2021 ah LDC hna dil thei tur hetiang hian an tarlang a

1. Higher Secondary School Leaving Certificate from recognized institution.

2. Diploma in Computer Application/ Certificate in Computer Application from institutions recognised by Mizoram State Council of Technical Education (MSCTE).

3. Typing speed of 30 words per minute.

4. Working knowledge of Mizo language at least Middle School standard.

He rules sub no 2 hi hi siam that vat anih loh chuan Health & Family Welfare bakah LDC post ruak hrang hrangah  he rules tlawhchhan hian advertisement an la tichhuak zel dawn anih hmel.   

Engvangin nge Certificate pakhat chauh sorkarin a pawm tih hi zawhna a tam hle mai. Thu dawn danin 6th Feb ah khan RTI hial pawh submit a ni tawh. DP&AR chhan tur ngei chi ni alang a, he thu ziah lai thleng hian chhanna a la awm lo.Zawhna langsar zual te chu :

1. LDC atan hian Computer Course MSCTE hnuaia DCA/CCA tlukpui leh a aia sang thiamna nei (MCA, BCA, BE/BTech Computer Science/IT, BVoc (IT), Diploma in Computer Science and Engineering, NIELIT O/A/B/C level, NIELIT CCC bakah NSQF course dang) te hi engvangin nge hnawl an nih?

2.  Overqualification dan nan he rules hi siam a ni em? Lo ni ta se, MCA/BCA /Computer Science & Engineer te pawh DCA/CCA nei tura hrilh an ni tho sia,  engtin nge DCA/CCA certificate nei te hi an overqualify lo tih hi Department ten an zawn chhuah ang?

3. DCA/CCA te zir ang hi LDC atan a that bik vang a ni em? A nih chuan enge a thatna bik? An zir ang chiah zirna course leh a aia sang zirna course, India rama certifying body UGC, AICTE, NCVET course dang te hi engvangin nge pawm a nih loh?

Mi rin tlaka tak hnen atanga Thu dawn danin Health & Family Welfare hotu te an zawh chiang a, anni chuan Recruitment rules an zawm mai a ni tih an sawi. LDC post an dil duh chuan Private Computer hnuaia CCA/DCA Certficate nei mai turin an hrilh a ni awm e. Computer lama ME, BE, MCA BCA, etc te pawhin LDC hna an dil duh anih chuan  MSCTE hnuaia CCA or DCA certificate nei turin  private computer  zirnaah an zir leh a ngai anih chu!  BA/MA pass tawh ten a hranpa a class I/II certificate an neih thar leh kher a ngai tihna a ni ber mai! He rules siamtu te hian hleihluak taka duhsak bik an nei ani thei em tih pawh hriatthiam a har ta.

Tunah hian he hna dil thei si, Computer zirlai tam tak ten harsatna an tawk a. Advertisement chhuahtu bakah ICT deptt leh MSCTE te pawh an dem hle. Hetih lai hian he rules hi ICT Deptt leh MSCTE ten an hriatpui lo tlat. ICT deptt phei chuan an enghelh hle a, IT Minister hnuaiah meeting kovin engvanga hetianga ti nge an nih tih leh ICT Deptt hi engvanga rawn lo nge an nih tih pawh an zawt hial. Hei bakah Computer thiam ten Sorkara   hnaan hmuh ve na tur ber Data Entry Operator leh Computer Operator post an paih daih te hi ICT Deptt. Phei chuan thalo an ti hle . Thudawn danin tunah hian Computer zirlai te harsatna  ching fel tur hian NGO thenkhat leh Zirlai pawl thenkhat ten hma an la mek a, a tul phawt chuan Court hial pawh thlen an huam. 

Service rules ah  LDC post hi Class 12 (HSSLC)  passs chin ten an dil thei. Computer professional course a zir ME, BE , MCA, BCA et.c te hi HSSLC pass vek annih avangin an qualify lohna a awm lo. LDC an dil duh anih phawt chuan sorkar tan pawh an tangkai hlei hlei dawn a. Hetih laia  thil awm ang lo lutuk a kan Sorkarin a block hi chu a pawi tak zet. DP&AR hian LDC recruitment rules hi siamtha  thuai se a duhawm hle. Computer Certificate pakhat chauh pawm lovin, “A hniam berah (At least) MSCTE hnuaia DCA/CCA or Equivalent from recognized  university/Board /Institution Certificate” tiin Mizoram chhung mai bakah India ram chhung a University/ Ministry/ polytechnic hnuaia  computer Certificate hi pawm ngei se a duhawm hle.

A tawp berah chuan, kan thalai hna zawng mek te thil awm ang lo lutuk a kan Sorkarin a block hi  a pawi tak zet a. DP& AR minister & Dy. CM  zahawm tak Pu Tawnluia hian he Mizoram Ministerial Service Rules, 2021, DP&AR in Notification a tih chhuah No. A-12018/31/2020-P&AR (GSW), the 30th Nov. 2021  SCHEDULE-III [Educational and other qualifications including age limit for direct recruitment] hi thlak turin hma la thuai se a lawmawm khawp ang.