BONEY M DINTU FRANK FARIAN (A chanchin ngaihawm tak chu)

Boney M dintu Frank Farian hi German ramah 18 July 1941 khan a lo piang a. German rama record producer, musician, singer leh songwriter lar tak a ni. Frank Farian hian music industry a luh chilh hma hian engemaw chen German ramah ei siam zirtirtu hna a thawk a. 

April 1967 khan a ma hming Frankie Farian hmingin Otis Redding's cover "Mr. Pitiful" tih Album a release a. Hemi kum tho hian German tawnga hla "Rocky" Dickey Lee's cover a release bawk a, hei phei hi chu thla khat dawn No 1 ah a awm a, gold Certification a dawng nghe nghe.

Music industry a luh chilh tirh hian group leh band aiah mal zai (solo) lamah a hlawhtlin zawk a beisei viau na a, a beisei angin a hlawhtling theilo. Kum 1967 ah Prince Buster's hla "Al Capone" a siam danglam a, a cover a tan "Baby Do You Wanna Bump" a phuah a, Boney M tih hming phuahin a tichhuak a. Heta tang hian hlawhtlinna kawl a rawn eng tan ta a ni ber mai. Mak ve tak chu, he tih hun lai hian Boney M hi a la piang lo hrim hrim a, hming lem a vuah mai mai chauh a ni.

BONEY M A RAWN PIANG TA

1970 chho velah khan Hotel leh entertainment program neihna hmun hrang hranga  mipui chawk hlim tura  lam chunga zai hi an uar hle a. Hetih hun lai hian Frank Farian-a pawh hi  hlaphuah thiam, zaithiam  leh producer lar tak a ni. A   hla record sa hi a ri lovin  hmuiphunin. (Lips Synchonise) a zai remin a lam thin. 1974 December thla khan Frank Farian chu chawlhkar 6 vel lai mai Europa Sound Studio ah hla thar record buaipuiin a tul hle mai. 

Boney tih hming hi Australian television detective series lar taka a changtupa  hming Boney tih atanga a phuah a ni. Frank Farian a chuan a phuah dan hetiang hian a sawi. "TV ka han switch on chiah chu Australian television detective series tawp lama credit inziak a lo lang mek a, a changtupa hming Boney tih inziak chu nalh ka ti hle mai a. Ka rilru in Boney, Boney, Boney... Boney M. Boney, Boney, Boney M  tiin ka sawi mawlh mawlh mai a, Boney M tih chu a lam a nuam em em bawk si a. Tichuan, Boney M tiin ka album hming chu ka phuah ta a ni" a ti.

Sawi tawh ang khan 1975 kumah Boney M single album hmasa ber “Baby, Do You Wanna Bump” chu release a ni.Netherlands leh Belgium ah te a larchho zel a, Kum 1975 kum tawp lamah Dutch chart ah a rawn lang ve hlawl mai a, Dutch TV-station atangin  Boney M chu TV show nei turin an rawn  sawm a.A mah bak Goup member an awm la awm der si lova, a buai kher mai. Boney M promote nan hun tha ani tih hriain Boney M hming a TV show neih ngei chu a tum ta a. Tichuan, TV show a lam turin  mi hang nula hmetha, zaithiam leh lamthiam bawk pali a sawm khawm ta a.

Reilo te chhungin Boney M chuan member pali a nei ta a. chung te chu:

1.Claudja Barry - Jamaican singer, songwriter and actress. 

2.Maizie Williams- Montserrat mi model atanga zaithiam a inlet  

3. Bobby Farrell -  Aruba  mi , lam thiam leh aw thum tak  

4 Liz Mitchell -  Jamaica mi , zaithiam tak leh Les Humphries Singers member

A tirah chuan Boney M hi  model leh lamthiam te intelkhawmna niin discotheque leh TV lamah te an inlan thin a, producer Frank Farina-a hla 'Baby Do You Wanna Bump' tih hla remin an lam thin. Show an neihna ah a ri a zai tak tak lovin, hla record sa ri lovin hmuiphunin an sak rem mai thin. Rei lo teah Germany chu a fanchhuak thuai. 1976 kumtir lamah chuan an zaitunu ber (vocalist) Claudja Barry chuan an group a chhuahsan tak avangin Marcia chuan amah ang bawk Jamaican mi, Liz Mitchell chu ani aiawh tur hian a rawt a, Mitchell pawh hi zaithiam bawk a lo nih avangin Frank Farian chuan Liz leh Marcia te chu 'Baby Do You Wanna Bump' chu a record that tir leh zui a ni.

1976 hnu a Boney M member pali  te chu:

1.Maizie Williams- Montserrat , British mi model atanga zaithiam a inlet  

2.Bobby Farrell -  Aruba  mi , lam thiam leh aw thum tak  

3.Liz Mitchell -  Jamaica mi , zaithiam tak leh Les Humphries Singers member 

4.Marcia Barrett- Jamaica mi, zaithiam tak  

Tichuan, Boney M album hmasa ber "Take the Heat off Me"  chu 1976 ah release a ni. Hetah hian Marcia Barrett leh Farian-a ten an record tawh sa an telh bawk a. Mahni tawk a zaithiam  em em vek an ni na chunging a tir lamah chuan an buai ve nak nak khawp mai.  Hla an han record  dawn a, Maizie Williams aw chu Frank Farian-a duhthu ang thlap ani thei lo a. "No Woman No Cry" ah khan  Maizie Williams zai tir a han tum leh a, a duhthu a sam lo leh bawk a.

Tichuan, Frank Farian-a  chuan  Liz Mitchell leh Marcia Barrett  te pahnih chauh hi hla satu atan a hmang chho ta zel a ni. Recording studio a neih sa a thuam tha zel a, hetah hian hla an record thin a ni.  Kum 1976 ah German TV show a "Daddy Cool" tih hla an sa a, mipuiin an lawm hle mai a, Europe ram pumah a darh a, 100 million records lai an hralh nghe nghe. Heta tang hian Boney M chu khawvel hriatah an lar chho ta a ni.

 
Tichuan, kum 1970 ah Boney M (German disco-pop group) chu a din fel ta der mai.Europe khawmual ah leh khawvel hmun hrang hrangah music tour an han nei tak tak mai chu, mipui lawm an hlawh ngei mai. "Daddy Cool", "Rivers of Babylon", "Rasputin" leh disco music a an her danglam "Mary's Boy Child" hla ngat phei chu a hit rem rem hle. An hun lai chuan Boney baka hit an awm meuh lo a ni.

Kum 1986 ah Farian-a hian American rock singer leh actor lar tak Michael Lee Aday (Meat Loaf ti a music khawvel a hriat lar) album "Blind Before I Stop chu German ramah a produce bawk. Meat Loaf hi a zai thiam bawk a best-selling music artists a tling hial nghe nghe. 1988 khan Milli Vanilli (German-French R&B duo) group a din a, member te chu Fab Morvan leh Rob Pilatus an ni. 1995 khan Latin pop band, No Mercy (American trio singers) a din bawk. member te chu Bronx-born Marty Cintron, phir unau Ariel leh Gabriel Hernández te an ni. 

Hei bakah hian hla record sa, hmui phun rema sa turin Vocal group a din nual bawk a, hengah te hi chuan member nghet awm lovin a hun laia a hmelhriat te a sawmkual mai thin. MCI record label bakah eng eng emaw record a nei nual bawk. A vanglai hian Farian-a hian Record 850 million lai a hralh a, 800 Gold leh platinum Certification a hlawhchhuak bawk. Tunah hian he German music Producer lar tak mai Frank Farian hi Miami, Florida, US ah a cheng mek.