CLOUD COMPUTING (PART1)

CLOUD COMPUTING

(Part 1)

Er. Chhungpuia Renthlei

Cloud Computing hi enge a awmzia?

Cloud Computing awmzia ber chu internet kaltlanga  Hardware leh software resource hrang hrang  hman hawh (rental) hi a ni. Cloud awmzia chu hmun hranga hranga computer network  hlawm hrang inthlunzawm tihna a ni a, "internet" sawina a ni bawk. Computing awmzia  chu computer hmanga hnathawh dan chi hrang hrang sawina  a ni. Tichuan, Cloud Computing chu internet kaltlanga computer hmang a hna chi hrang hrang thawh theih dan  sawina a ni.

Cloud computing hmang hian Internet connection awmna apiangah computer’s hard drive /local server  a install  kher lovin internet server a  program awmsa awlsam taka kan hmang thei a, mamawh hun apianga hman theih turin data kan dah khawl thei bawk. Cloud computing hi mi pakhat emaw, company pakhat siamchhuah a ni lo a, technology hmasawn chhozelin a rawn hrin chhuah a ni. 

Cloud storage siam hmasa bertu chu  Computer scientist Dr. Joseph Carl Robnett Licklider a ni. Kum 1960 khan  alo siam tawh a ni. IT Company ten Cloud Storage tangkai tak tak an rawn siam zela, a langsar zual te chu:- 

1.YouTube: Video files tam tak upload, stream leh download na

2.Picasa and Flickr : Online photo albums siamna leh dah khawmna  

3.Google Docs : Presentations, text documents leh slides siamna, dahkhawmna leh enna 

Hmasawnna athang zela tunah chuan cloud computing hian a huam zau hle mai. Application software tangkai tak tak kan computer /Smartphone a  install kher ngailova internet a mi kan hman ve mai theihna te, email, Google drive, facebook, e.t.c hmanga data kan dahkhawl ve theihna te hi Cloud computing hian a huam vek a.  

Awlsam taka Google play store atanga Software Application kan download theihna te hi a huam vek bawk. Tin, Software developer ten Software siam nana Internet a awmsa kan tihdanglam (Customise) te, Platform  kan hman te leh  Tools & feature hman mai theih tur awm te hi a huam vek a ni. 

Cloud Computing Architecture:

Hei hi Computing atana hmanraw hrang hrang (component) leh component chhunga hmanrua (Sub-Compnents)  sawina a ni. Hlawm thuma then ani

1. Front end : Cloud hmangtute min lo dawngsawngtu ( Fat client, thin client)

2. Back end platform:Hnathawktu leh thil dahkhawmna (servers, storage) 

3.Cloud based delivery & network: Cloud service provider ten cloud hmangtute hnena service an pekna leh inthlunzawmna ( Internet, Intranet, Inter cloud).

CLOUD SERVICE PROVIDER:

Internet kaltlanga  awlsam zawka hna kan thawh theihna tura Cloud service chi hrang hrang min petu company te hi Cloud service provider tiin an vuah. Cloud Service provider chi hrang hrang an awm a, an service chi hrang hrang an pe thin. Cloud service provider lian leh lar tak tak te hian services chi khat aia tam an pe bawk thin. Amazon Web Services (AWS), Windows Azure, Google App Engine, Google Cloud, IBM, Oracle Cloud te hi India ramah chuan a langsar zual  te an ni. 

CLOUD COMPUTING SERVICES MODEL(Cloud Computing hnathawh dan):

Cloud computing services hi hlawm lian tak tak pathum ah then a nia, chung te chu:-

1.Software-as-a-Service (SaaS)

2.Platforms-as-a-Service (PaaS)

3.Infrastructure-as-a-Service (IaaS)

1. Software-as-a-Service (SaaS): 

Hei hian Internet kaltlanga Software hmanhawh theiha pekchhuah na chi hrang hrang a huam. Cloud service provider te hian Internet kaltlanga hna thawh theihna tur software tam tak an siam a,  an mahni server ah heng  software te hi an dahkhawm  thin. A then chu a free a, a tam zawk erawh chu hman man chawi a ngai. Cutomer ten kan hman tam dan a zirin a man a bituk vek a, internet kaltlangin an cutomer te hnenah an pechhuak thin. Hei hi  pay-as-you-go  an vuah. 

Keimahni  computer/Smartphone a install  emaw, enkawl buai ngai miah lovin kan hmang thei a, a awlsam hle. Hetiang SaaS application Software te hi Web-based software, on-demand software, or hosted software tiin an vuah. Hetiang service petu te hi Cloud SaaS Service provider an vuah. A langsar zual te chu: Cloud9 Analytics, Salesforce.com, Cloud Switch,Ms Office 365, Eloqua, dropBox, Cloud Tran.e.t.c

A tangkaina

1.Tullovah engmah kan chawilo. Kan hman atan chauhah man kan chawi.(Cost Effective)

2.Installation leh maintenance ah engmah kan buaive a ngailova, hun senral a tlem( Reduce Time)

3.Internet connection a awm phawt chuan hmanraw hrang hrang hmangin khawi hmun atang pawhin Software Application te hi hmang ve thei (Accesssibility)

4.SaaS provider te hian a tul hun apiangah software min update sak thin (Automatic Update)

5.Kan mamawh a zir zelin  Software service leh feature tlemte emaw, tam tak kan hmang ve thei (Scalability) 

2. Platforms-as-a-Service (PaaS):

Hei hi Software siamtu (Developer) te tan a ni deuh ber. A bik takin Internet application Website siamna leh Website host na tangkai tak a ni. Cloud service provider ten Software siamna computer hardware leh software mamawh chi hrang hrang an dahkhawm a, internet kaltlangin cutomer te hnenah an pechhuak thin.Hetiang service petu te hi Cloud PaaS Service provider an vuah. A langsar zual te chu: Amazon Web services, Salesforce, Windows Azure, Google App Engine, cloud Bess, IBM smart cloud. 

Dan pangngaiah chuan software siam turin sum tam tak senga software  siamna hmanraw hrang hrang computer chak tha takah install vek a ngaia.Hei bakah Network, server, OS, Storage buaipui vek a ngai thin.Tunah chuan  PaaS kaltlangin awlsam zawkin software an siam zung zung tawh a, an duh ang tawka an siam hnuah local computer ah emaw, Cloud storage ah an install thin. Web application ah phei chuan software siamna bakah web host nan an hmang nasa hle.

A thatna

1.Web browser hmanga awlsam taka hman ve mai theih a ni a, hman a remchang hle a ni.

2.Sum tam tak senga Software siamna hardware leh software tools man to tak taka lei a ngailo

3.Software building, testing, deploying, managing leh  updating e  a support vek bawk

3. Infrastructure-as-a-Service (IaaS):

Hei hian Internet kaltlanga computer Hardware leh Software hmanraw ( infrastructure)  hrang hrang keimahni neih kher ngailo a kan hman hawh ve theihna tura cloud service hrang hrang a huam. Hetianga khawia mi nge awm tih pawh hrelo a awlsam taka kan lo hman ve theih ang chi te hi Virtualization  tiin an sawi bawk.  Hetiang service petu te hi Cloud IaaS Service provider an vuah. A langsar zualte.Amazon web services, Bluestack, IBM, Openstack, Rackspace,Vmware.

Could service provider te hian Computer Hardware leh Software hmanraw ( infrastructure) hrang hrang :- networking equipment, devices, database, web servers te hi mamawh dan a zira man chawi a hman theih turin customer te siam sak thin. Hardware as a Service (HaaS) tiin an vuah bawk. A hman dan hi  hour, week,  month anga chhut a ni thin a ni a, IaaS Provider hnenah hman man hi pek a ni thin. Software siamna hmanraw hrang hrang:- Operating systems, security, networking leh servers  a awm bakah  deploying development tools, databases, etc. te a awm bawk. 

A thatna:

1.Infrastructure man to taka lei ngai lovin kan hman chhung chauh atan fee kan pe a, sum sen a tlem.

2.Iaas hmanga web host hi Webhosting pangngai aiin a man a tlem zawk a, security pawh a tha zawk

3.IaaS Cloud Provider ten thil tul apiang an lo ti zela, ahranpa a maintenance zui a ngailo.