Er. Chhungpuia Renthlei
An hrawk a lo chak theih nan saruh hriam leh sak tak tak te a pe a...
An vun leh thla a lo chak theih nan an taksa dep a hnah nem te chu a paih sak a..
Thlawh an thiam theih nan van sanga atangin a thlak a...
An huaisen theih nan rannung hlauhawm tak tak a nung chungin a pe a....
Khawvel hreawm takah pawh huaisen leh tuarchhel takin an dam khawchhuak thei thin..
Mupui hian a note te tan bu rinawm tak a chhep a, nuam taka an awm theih nan an bu chunglamah hrui leh hnah nem a dah a. An keu hma atanga an keu hlim chhawn ni engemawzat chu dimdawi takin an enkawl a, hmelma lakah leh thli leh ruah laka an him theih nan englai pawhin an vil a, chaw nem leh ei nuam tak tak nen an chawm thin.
An lo len deuh chuan a an vun tichak tur leh tawrhchhel zirtir turin a bu chunglam a hnim hnah nem chu paihin, hnah khawng leh thing tang rualrem lo tak tak te chu a chungah a dah a. Heng te hian an vun no leh nem tak te chu a nawt vual tet tut maia, hreawm tiin an tal vak vak a, an tal nasat poh leh an vun te chu a vual nasa mai a.Ni engemaw zat hnuah chuan an vun te chu a lo char ve tial tial a, ngaiah an nei ve leh mai thin.
Ni engemaw zat hnuah hmul nem tak an rawn nei a, hmul chak leh khawng tak an neih theih nan a bu chu thai darhin hling leh thing tang hriam tak tak te chu a chungah a hai chhuak leh a.A note te chu hreawm tiin an thla te an tiparh a, hling leh thing tang hriam tak tak te zingah chuan an tal an tal a, an hmul nem te chu a tla darh nuaih thin. Ni engemaw zat hnuah chuan hmul nghet leh khawng tak tak a rawn to chhuak thin.
Awlsam taka ei nghal theih chaw nem leh lem nuam tak hlir eitur an nei reng dawn loh avangin mupui chuan a note te chu saruh ei har tak te a pe a, a changin huaisen zirtir nan rul leh sangha nung lai te a pe a. A tirah chuan an hlau thin hle a, ei har an ti hle a.Mupui chuan an ei tur rannung tihlum dan te a zirtir a, ni engemaw a ral hnu chuan saruh hrawm hraw tak tak te an ei thei a, awlsam takin an eitur rannung te chu an tihlum ve thei thin.
An lo len hnu deuhah chuan mipui chuan thlawh dan a zirtir leh a, an bu chu a thaidar chiam a, a awng hiau huau mai a, a note te chu tlak hlauvin an in hma tanga , an theih tawpin an thla an zap a. ahse, reilo te hnuah an tla thla vawn vawna, a chang chuan sang takah a thlawhpui a a thlauh thut thin. Mahse, an nunna tana hlauhawm a an awm hma emaw, lei an tlak thlen hma inmupui chuan a lo dawng leh zel thin. Ni engemaw zat hnuah chuan thawhdan an thiam a, nuam ti takin vansangah an lengkual thin.
Mupui hian a note te hi chaw nem leh ei nuam tak a pe reng lo a, harsatna an tawhin duat takin a enkawl liak liak lova, an duh ang apiang a tihsak lova, mahni inenkawl thei tura an than puitlin theih nan hmangaihna nen tawrhrchhel dan a zirtir zawk thin. Hei vang hian an lo puitlin meuh chuan an tuar a chhel a, an huaisen a, an chak a, anmahni an inchawm thei thin.
Keini mihring te erawh chuan hmangaihna aiah lainatna nen kan inenkawl a, kan taksa a fit lova. Tawrhchhel kan inzritir phal lova engemaw hlekah kan tuar a zuau em em thin.Kan ramah mahni intodelh tumlo leh tum pawh nise theilo tur chiang sa, chhungte thawh sa ringa khawsa kan pung thur thur anih hi! "Mihring chauhlo chu zirtir an ngailo" tih loh rual pawh a ni lo e. Mipui nun atang ringawt pawh hian zir tur kan ngah hle mai.
){kind=link}
0 Comments