IT ACT-A SECTION 66A SUPREME COURT (SC) IN A HNAWL

IT ACT-A SECTION 66A SUPREME COURT (SC) IN A HNAWL :

IT ACT SECTION 66A
Online-a thil post avanga man theihna dan IT Act section 66-A in a sawi chu, mi tu pawhin computer leh a kaihhnawih hmanga mi dang tana thu huathlala emaw, hlauhthawnawm emaw, dâwt thu, mi dangte tana awm nuam lo, harsatna siam leh tithlabár thei thil a thawn chhuak a nih chuan kum thum theng tân theih a ni.

ENGVANGIN NGE HNAWL ANIH?
Supreme Court (SC) chuan IT Act Section 66A hi a fiah tawk lo a, ram danpui Constitution 19(1)A palzutna a nih thu a sawi. Court chuan 66A hian , 'thu sawi tur leh thil tarlanna atana mimal zalenna neih' a nghawng a ni tiin, mi pakhat tana thil ngeiawm tak chu midang tak a lo ngeiawm kher lo thei bawk niin a sawi.

Supreme Court- chuan Information Technology Act Section 66-A chu Fundamental Right (Article 19 of Indian Constitution), mahni duh zawng sawi theihna a kalh a ni a ti bawk. Tichuan, Tuesday, 25th March 2015 khan Supreme Court (SC) chuan IT Act-a Section 66A a hnawl ta a ni.

Section 66A ennawn tura PIL thehluh hmasak ber chu kum 2012 kha a ni. Petition thehluttu hi law student Shreya Singhal a ni. Singhal chuan Shiv Sena hotu, Bal Thackeray thihna avanga Mumbai-a pawnchhuah khap anih tuma a sawisel zawnga Facebook-a thu post-tu leh a lo like-tu, a thiante man an nih vangin dan hi ennawn turin petition a thehlut a ni.

Online-a thil post kaihnawih ah hian Kum 2013, May 16 khan Supreme Court chuan social networking site-ah huat theih thil post-tute chu police senior officer, IG emaw DCP emaw te phalna hmuh loh chuan man theih an ni lo ang, tiin a lo rel tawh a ni.

ONLINE A THIL POST VANGA MAN THEIHNA DAN DANG A AWM EM?
Online-a thil post avanga man theihna dan IT Act section 66-A hi paih tawh mah se, IT kaihhnawiha thil dik lo leh tha lo tite chu IPC section hrang hrang hmangin thubuai siamsak theih tho an ni.a, thubuai siamsak an awm nual tawh bawk.