-Er. ChhungpuiaRenthlei
“Khawvel hian Skilled workforce a mamawh a, India pawhin ‘skilled workforce’ a mamawh a ni” tiin kum 2014 a India independence day lawm tura mipui nuaih tel zet pungkhawm hmaah prime ministerNarendhra Modi chuan uar takin a sawi. Skilled workforce awmzia chu hnathawk tlak tak tak tura kut themthiamna neite hi an ni. Anihna takah chuan ram chhung development project work tam ber khawihtu te hi skill development thiamna nei te an ni.
Line hrang hranga thalai thiamna tipung tura sorkar laipui hmalakna Skill development hi Prime Minister thusawi bawhzuina atana chhawpchhuah langsar ber pakhat a ni nghe nghe.Thalai te thiamna hlawk taka chhawr dan buatsaih a, an theihna leh thiamna (Skill) tihpunga hna chi hrang hrang hlawk zawk leh tha zawka thawk thei tura chherchhuah zirtir hi Skilled workforce tum ber a ni.
Mizo thalai zingah matric pass lo thahnem tak kan awm a, BA /MA pass te pawhin sorkar hna an thawk vek theilo.Kan zirna line ah Graduate / Master kan nih avang ngawta sorka hna tha tak thawk tur kan ni vek lo a, Graduate / Master kan nih ve theih lohvanga hnathawh tur hmulo vek tur pawh kan ni chuang lo.Lehkhathiam sang ringawt hian hna an thiam kher lova,kut them thiam tak hian hisap an nei tha bik kher lo a, tharum ngah nazawng an thawk sawt kher lo bawk.
Heivang hian kan thiamna in a phak tawka hnakan hmuh theih nan skill development courses hrang hrang a Skill Development Agency (NSDA) hnuaiah sorkar laipui chuan Business skills, Tech skills leh Wellness skills te a ruahman a, sorkar hna mai bakah entrepreneur development lamah ngat phei chuan thalai hnazawng mek te tan eizawnna siam saktu pawimawh tak a ni. Heng course hlutna leh a tlukpui thiamna te hi kan neih ve a tul hle. Zirna line a Graduate / Master degree nei tawh tan pawh Skill development courses Certificates te hi hna zawnna atana supporting documents pawimawh ber zinga mi an ni.
Hnathawk tha tur leh thawkhlawk tur chuan a thawktute thiamna leh finna tihpun leh in zirtirna tha bakah taimak a ngai. Kan chheh vel vai ho hi hemi kawngah hian an entawn tlak khawp mai. COVID 19 hripui leng karah pawh thawhsen loh hna an hmu a. Mistiri leh helper ringawt pawh nitin za tel teh meuh kan ram chhungah hnathawkin an awm mek a. Lockdown vanga vai ho an haw chuan hlhawfa chhawr tur an vang pharh mai. Hna avang kan tih kan tih laia hnamdang ten han thawh sen loh an hmuh si te han ngaihtuah hian thalaite tan sum thawh chhuahna awlsam tak, technician education lam hawia,tun aia chak zawka sorkar leh mipuite hian Skilled workforce lama rilru kan her a tul hle mai.
Mizo thalai ten kan thil tuipuite hi kan mamawh ber an ni fo lem lo. Uluk taka ngaihtuah chuan Infiamna hmun hma tha kan sorkarin a buatsaih te hi tuipui viau mahila mizo thalai tam zawk mamawh erawh a ni ber lo tlat. Mizo thalai tam zawk te mamawh ber zawk chu eizawnna anih tlat vangin Skilled workforce ngaih pawimawha tul khawp mai. Kan ram hmasawnna a chak ema vangin hnathawhna hmanraw thar leh hnathawh dan thar a rawn chhuakzel a.Vai ho thawh tura kan dah zel mai te hi sum tam tak luanralna a ni. Mizo thalai ten training na mumal tak kan neih chuan eizawnna kawng thar a inhawng zel mai dawn. Tin, chhungkuaah kut themthiamna nei an awm phei chuan an fate emaw, unau te helper ah an hmang nghal thei bawk a, chhungkaw eizawnna kawng tha tak an nei thei mai dawn bawk.
Thalai hnathawh tur nei lo tamna hmun a piangah sualna a pung duh leh nghal. Gospel camping leh JAC hmanga tihrem chi a nilo. Kan thalaite nun siamthatna hmanraw pawimawh ber chu an hnathawk tlaka Vacational traning an tuina trade a an thiamna tipung a, skilled workforce ni thei tura chherchhuah a, an phak tawk ang zela eizawnna tlak hnathawh tur siam sak hi thalaite eizawnna siamsak nan leh nun siam thatna atana tul hle tawh mai. Kum khat chhung ringawta vai hnathawk ten kan ram sum an lak hi maktaduai tel teh meuh a tling a ni. Vai mistiri leh helper thawh ngailova mizo thalai Skilled workforce lama cher chhuah hi YMA kumpuan RAM LEH HNAM HUMHALH tihlawhtlinna pawimawh tak a ni.
0 Comments