CARD (Plastic Money)

 CARD (Plastic Money)

Er. Chhungpuia Renthlei

CARD hi plastic money  tiin an sawi thin bawk. Card hi bank pekchhuah a ni a, card neitu hnena pekchhuah dan a zirin a hman dan  te pawh thliar hran a vek ni. ATM atanga pawisa lak chhuah mai bakah Petrol pump ah leh dawr thenkhatah Bank PoS (Point of Sales) khawl an neih tawh avangin mipui ten awlsam takin card kan hmang thei tawh bawk.

Aw le, tun tum chu Credit Card, Debit Card,  MasterCard, Visa leh  American Express chungchanga kan hriat tur tul zual  tawngkam mawl mang takin han sawi thuak thuak  ang  hmiang. 

DEBIT CARD :

Debit chu Chhuak tihna a ni.I account-ah Engzat nge in Debit ? Kan tih chuan,  I Account atangin pawisa engzat nge chhuak? Tihna a ni. Debit Card Chu pawisa lakchhuahna a ni. Thil lei nana Debit Card kan hman chuan keimahni pawisa kan  bank account ami  kan hmang ani tihna a ni. Debit Card  hi bank account nei tawh phawt chuan an nei thei vek. Debit Card   a pawisa awmzat chu Bank a kan pawisa neih zat hi a ni mai. ATM Card in pawisa kan lachhuak thin a. Chuvangin ATM Card leh Debit Card hi a inang  tlangpui a,  ATM Card tih hi Noun Form-a sawina ani a,  Debit Card kan tih chuan Verb Form-in kan sawi tihna a ni.  

CREDIT CARD

Credit Chu Lut tihna a ni. I account-ah Engzat nge in Credit? Kan tih chuan, I Account-ah pawisa engzat nge lut ?  tihna a ni. Credit Card chu Bank pawisa pukna Card a ni, Debit Card chu pawisa lakchhuahna a ni.Thil kan leiduh a, kan account ah pawisa kan lo nei mai silova, Credit Card kan neih erawh chuan, kan Credit limit azirin kan Credit Account a mi kan hmang puk thei a, hun tiam chhunga kan Credit Account-a kan rulh (Credit) leh tur a ni. Credit Card hmanga thil kan lei emaw, pawisa kan lakchhuah chuan card kan neihna Bank   pawisa kan   puk tihna ani. Credit Card hi mi nazawngin an nei thei lo, hna mumal neilo te, kum tlinglo te, i awmna rama citizen/green card nei etc te i nih loh chuan dan ang thlapa neih theih ani lo ang. Kan income a zir te, i credit history (ba i rulh that dan a zir) te leh i mamawh dan a zirin bank in Credit Card hmanga pawisa kan hman puk theih zat an bituk thin.

Credit Card leh Debit Card kan nei kawp a khawi zawk nge kan hman ang?
Credit Card hi online transaction te, zinna ah te, thlawhna ticket leh thil lian tham leina ah hman a tha. Debit Card erawh chu thil lian tham lem lo , entirnan restaurant ah te, chawhmeh bazarna ah te, servo (petrol) ah te leh thil tenau neuh neuh leinan te ATM atanga pawisa lak chhuah nante hman atha.  

MasterCard, Visa, American Express  ve thung hi ?
MasterCard leh Visa hi chu Credit leh Debit Card payment processing company an nia.

card hmanga thil kan  lei apiangin kan thil leina te dawr a tangin kan  card details leh pawisa kan hman zat   Visa emaw, Master card company te khan an lo buaipui thin.

Visa/Mastercard company khan I bank hnenah i pawisa hman zat a hriat tir anga, i Bank khan i thilleina te bank account ah pawisa i hman zat kha an va pe ang. MasterCard i hman chuan MasterCard company in i data a process anga, Visa i hman chuan visa company in.

Credi leh Card min pe tu  hi  Visa emaw, Mastercard emaw nilovin,  Account kan neihna   bank hi ani.  Kan account neihna bank te hian kan awlsa zawka thil lei nana card kan hman theih nan Mastercard leh Visa an hmang ve chauh zawk ani

American Express erawh  hi  chu Bank ang ani nghal a, a card issuer  ani nghal bawk a, payment pawh an process nghal bawk.  American Express Cardkan  hman chuan Account kan neihna bank ami pawisa  hmang lovin, American Express company pawisa i hmang tihna ani.

 Visa nge Master Card nge American Express Card tha zawk?
 LG TV nge Panasonics TV tha zawk tih ang deuh ani.  Visa card rau rau pawh a in ang lo deuh vek a,   Visa Gold card chuan rewards points pawh a keng tel maithei,travel insurance te pawh a keng tel maithei, mahse interest rate  a sang viau  mai thei. Mastercard chuan rewards a keng tello mai thei, mahse interest rate a hniam viau thung thei. Hetiang zel hian a in that chhawkna lai a awm zela, kei mahni tana tha zawk ni a kan hriat thlan mai tur a ni e. A that dan chu i card terms and conditions leh contract details ah khan a in ziak ang.

Eng pawh nise, Bank hi sumdawng an ni a, mipuiin kan dawr loh chuan sumdawnna an nei dawn lo a,  kan hlawkna  ni bawk, an mahni hlawkna ni bawk tura engkim hi ruahhman a ni. Eng card pawh nei ila,  interest rate te, free interest days te, Cash advance rate    te ani.   bank issue tu a zirin a in ang lo deuh veka, chuvang chuan keini a hmangtu te hian bih chiang ila, fimkhur taka hman thiam a tul a ni ber mai.

.