KHAWVEL MOBILE HANDSET HMASA BER

Motorola DynaTAC 8000X )

-Er. Chhungpuia Renthlei

Kumin 2019 atanga chhuta kum 46 liam ta  April 3, 1973 khan  Motorola  company Senior Engineer, Martin Cooper-a chuan "Joel, Marty ka nia, Cell phone  hmangin ka rawn bia a che,  kuta ken sawn mai  mai theih  cell phone dik tak  hmangin ngat in a nia." (Joel, this is Marty. I'm calling you from a cell phone, a real handheld portable cell phone.") tiin Bell Labs Hotupa ber Dr. Joel S. Engel chu khawvela mobile phone hmasa ber Motorola DynaTAC 8000X  hmangin in ava bia a.Hei hi Mobile a  khawvela inbiakna hmasa ber a ni. Khawvela (handheld) cell phone hmanga  mi be hmasa bertu, Martin Cooper-a hi Fathers of the (handheld) cell phone tih a koh a ni nghe nghe.

Hetih hun lai hian Motorola company hi New York  khawpui laili tak Manhattan ah a awm. Tin, Bells Labs hi Scottish Sientist hmingthang kum 1885 a American Telephone and Telegraph Company (AT&T)  dintu, Alexander Graham Bell a hmingchawia phuah a ni a. Martin Cooper an a va biak  hun lai hian Bell Laboratory headquarters hi  USA  hmarchhak New Jersey State huam chhung Murray Hill complex ah a awm thung.

Martin Cooper-a hian engvanga  hmun hla taka  awm Bell Labs  hotupa va be kher  nge tih hi mi tam ber zawhna a ni.  Martin Cooper-a sawi dan takah eng dang vang nilovin, hetih hunlai hian Tele communication hmasawnna kawnga thil siamchhuahna ah Motorola  leh Bell Labs  hi an in el nasa em em a, hetianga Motorola ten  hlawhtlinna an neih takah chuan Martin Cooper-a hian ava intih theih khum ve hrim hrim a ni.

Khawvela mobile handset siamchhuak hmasa bertu Motorola company tobul.

Motorola, Inc hi September 25, 1928 ah Paul Galvin leh Joseph Galvindin a ten an din a. Motorola hming hi  thil pahnih atanga lakchhuah a ni. motor tih hi motorcar atangin, ola tih hi Victrola tih atanga phuah a ni. American multinational telecommunications company lian tak a ni.Motorola hian cellular transmission base stations, signal amplifiers leh wireless network hmanraw hrang hrang an siamchhuak a, an hralh bawk thin.

Motorola hi  khawvela mobile handset hralh chhuak hnem ber "the world's biggest seller of mobile phone handsets" tih hial a ni thin. Mahse, Kum 1998 khan  Nokia in a  lehpel a.Nokia hmasawnna a chak em avang leh company hrang hrang hmasawnna avangin  Motorola chuan  kum 2007 -2009  chho khan Dollar 4.3 billion  lai mai a hlauh  nghe nghe. Heivang hian January 4, 2011 atang khan  kalphung thlak in, Motorola Mobility leh Motorola Solutions tih hmingin independent public companies pahnihah an then hrang ta a ni.

Hei le khawvela mobile handset hmasa ber   Motorola DynaTAC 8000X  chu !

Motorola DynaTAC 8000X  hi  khawvela analog cellular mobile phone  hmasa ber a ni. A sei zawng hi 3300 cm, a hlai zawng 898 cm a chhah zawng 445 cm a nia, 1 kg laia rit a ni. Built-in memory a nei lo a, contacts  list pawh 30 chauh a dah theih bawk. LCD Display a hmanga, Mini Sim - Regular SIM card size a hmang bawk. Ni-Cd Battery  a hmanga, charge full nan darkar 10  angaia, 30 minute chhung chauh  inbiak nan a hman theih..

September 21, 1983 khan U.S. FCC te chuan approval Certificate an pe a. Tichuan, kum 10 zet ral hnuah kum 1983 kum tawp lamah chuan mipui hman theih tura  zawrh chhuah  a ni ta. Tunlaiah chuan  computer tluk zeta  powerful  awlsam te a kenkual theiha zang khai, memory lian tak nei leh LED display fiah tak  nei  Smartphone changkang ber ber kan nei ta. Heng tuna kan handset hman mek te rawn hringchhuaktu leh   khawvela mobile handset hmasa ber  Motorola DynaTAC 8000X  Cellular Phone  leh  tuna smart phone chhuak thar ber  hi lei leh van ang mai a ni .

Fathers of the (handheld) cell phone ti a koh  Martin Cooper-a hi tunge ?

Martin Cooper, Marty ti a koh  hi  American engineer a ni a. Wireless communications industry, a bik takin  radio spectrum management  lama  mithiam hmasa a ni. A nu leh pa chu Arthur Cooper, Mary Cooper an ni.Krismas  ruai theh ni  Kum 1928 December  26  khan Chicago, Illinois, United States ah a piang a, American khua leh tui a ni.  Kum 1957 khan Illinois Institute of Technology atangin Engineer a zir zo. Kum 1991 khan  Arlene Harris-i nen an innei.   

Martin Cooper-a  hian Wireless communications industry lama a hnathawh ropui tak tak te avangin Charles Stark Draper Prize  leh Webby Award for Lifetime Achievement  te a dawng nghe nghe. Kum 2013 khan ‎Marconi Prize‎  a dawng bawk. Martin Cooper  hi a la dam tha a, Tun kum 2019 hian a kum 90 na a hmang mek   Motorola  company Senior Engineer, Martin Cooper-a leh  a thawhpui te  hi  Mobile communication khawvelah chuan  nghilh ni an awm thei ngai  lovang.