MARK ZUCKERBERG
Er. Chhungpuia Renthlei
Kan khawvel a inher danglam zel a, kum 2010 hnulamah phei chuan nitin deuh thaw internet kan hmang ta reng mai le. A bikin facebook leh WhatsApp ngat te phei hi chu mizo society ah hrelo kan awm tawh lovang. Hetiang khawvelah kan cheng ta sa sa, tun tum chu khawvel mi maktaduai 500 chuang awlsam zawka inkawm thei tura thlunzawmna zamchhuaktu, chanchin leh ilo inhlui tawn dan thar siamchhuaktu leh keini Zofa te nunphung hial mai pawh min thlakthlengtu American computer scientist,software developer, philanthropist leh khawvel social network lar ber Facebook neitu Mark Zuckerberg-a chanchin han tarlang ve lawk teh ang.
Kum 1984 May 14 ah White Plains, New York ah a piang. A hming pum chu Mark Elliot Zuckerberg a ni. American khua leh tui a ni. A pa hming chu Edward Zuckerberga ni a, a nu hming chu Karen Kempner a ni . Apa Edward-a hi Ha doctor (dentist) a ni a, a nu hi Rilru lam doctor (psychiatrist) a ni thung . An chhungkua hi Atheism sakhaw vuantu te an ni. A pianpui unau te chu Arielle Zuckerberg, Donna Zuckerberg, Randi Zuckerberg. A naupan lai chuan a unau te nen Dobbs Ferry khua ah an cheng thin.
Middle school a kal lai atangin computer programming lamah a tui tawh hle a, Kum 6 mi lek anih lai kum 1990 daih tawh khan Atari BASIC Programming a pa in a zir thin. A rilru a chak si a, thiam zung zung mai a, zawhna har tak tak a zawt reng mai bawk nen, a pa thiamna pawhin a tlin ta ngang lo va. Computer zirtirtu Newman hnenah tution a kal ta a. Reilo te zir hnuah ah Newman-a thiam loh thleng thleng a a zawt a, Newman-a pawhin harsa a ti thin hle.
Ardsley High School New York ah a kal thin a, hemi hnu ah Phillips Exeter Academy, New Hampshire ah a zir zawm leh bawk. Heta a kal lai atang hian zirlai fing chungchuang tak a ni a, astronomy, mathematics, physics, English classical literature leh foreign languages ah exihibition ah a tel thin. High school a kal lai hian astronomy, physics, and mathematics chawimawina a dawng nghe nghe. Mercy college ah software programming a zir bawk. Heta a kallai hian software tha tak an chenna in leh a pa ofiice inthlunzawmna tur communication network software ZuckNet ti a a vuah chu a siamchhuak a. A pa in a hnathawhnaah a hmang tangkai hle. Tin, hetihlai vek hian music player software Synapse Media Player' a siamchhuak bawk. Hei hi company lar tak mai 'Intelligent Media Group' hminga a siam a ni.
Harvard University ah a zir zawm leh a.Hetah hian major subject ah psychology leh computer science a la a. Harvard University a akal lai hian computer software devlopement lam a luhchilh tak tak tan ta. Havard University zirlai ten an zirtur courses an thlan theihna tur atana software tangkai tak 'CourseMatch' ti a avuah chu a siam phawt a. Hemi hnuah infiamna thil atana hman turin an zirlai zinga hmeltha ber thlanchhuah theihna tur software 'Facemash' ti a a vuah chua a siamchhuak leh bawk a .Facemash software hmang hian Harvard University zirlai hrang hrang passport size photo tam tak an lakhawm a, hmeltha an tih ber an thlangchhuak thin. He Facemash software hi a ni, vawin thlenga kan hrialar em em Facebook bul intanna chu.
Kum 2004 Febuary thla ah Mark Zuckerberg-a Havard University a a kal laiin Havard University kal te profile, thlalak, leh chanchin te in share tawn na turin facbook hi a siamchhuak. 'Thefacebook.com'. a tlangzarh a. Hemi hmang hian a thian te Chris Hughes, Eduardo Saverin, Andrew McCollum leh Dustin Moskovitz te nen e social networking site an siam a. Kar khat a tlin hma daihin Havard University zirlai 1300 vel lai an in register. Mak tak maiin Facebook chu a thang chak hle a, Boston University te leh America ram a zirlai chauh mai bakah mi tamtak an in register. Kum 2005 ah facebook.com tih domain hi lei a ni. Kum 2006 atangin educational institude zawng zawng te leh a duh apiang tan Email (Electronic mail) hmanga join theiha siam a ni..
Khawvelin Mark Zuckerberg kan hmelhriatna ber chu Facebook hi a ni. Facebook hi a thian te Eduardo Saverin (business aspects), Dustin Moskovitz (programmer), Andrew McCollum (graphic artist) leh Chirs Hughes te nen nasa taka an thawh hona a zara hlawhtling a ni. Google leh Yahoo lam pawhin Facebook hi Zuckerberg-a hnenah lei an dil tawh a, mahse an hlawhchham chiang hle.
November 15,2010 khan email address @facebook.com hi ah an tlangzarh. Kum 2016 a rawn inherchhuah meuh chuan, mizorama kan politician leh contractor te hausat thut ang lo deuh in, mahni thiamna leh thawhrah ngei hmangin Mark Zuckerberg –a chu a hausa ta hle mai! A sum leh pai zawnga a hlawkna chu $1.6 billion a lo ni ta.FORBES chuan Mark Zuckerberg-a net worth hi $56.6 billion vel niin an chhutsak a, chuti a nih chuan khawvela mi hausa ber zinga 4-na a lo ni ta tihna a ni.Microsoft Bill Gates a hausa ber ang a, a dawtah Amazon neitu Jeff Bezos, a dawt lehah Berkshire Hathaway neitu Warren Buffett a ni ang a, a dawt leh, a 4-na chu Facebook neitu Mark Zuckerberg a lo ni ta an ti a nih chu. Mark-a hian 'Harvard University' a a kallain Priscilla Chan a hmelhriata , an in ngaizawng chho ta a .
Nikum 2017 ah khan FB hmangtu tam lam hi billion 2 aiin an tam tawh a. Khawvel mihring awm zawng zawng hmun 4-a thena hmun 1 hian Facebook an hmang. Chuvangin fakna siamtu companyte hian FB hi an bawh nasa em em a. sumdawnna lam advertisementah ringawt pawh pawisa a hailut hnem hle. Facebook siamtu Mark Zuckerberg sum lakluh a pung NASA hle a, fakna avanga sum lut a tam ta hle a ni Naupang lai mumanga lian tual tual ang khan Mark Zuckerberg hi a lian tual tual a, khawvel mi a maka maka tam tan malsawmna a ni bawk a ni.
Facebook chief Mark Zuckerberg chuan tun hnai khan an company a din a china hun kirh ber " Facebook-Cambridge Analytica data scandal " an hmachhawn ve ta tlat mai. ‘This is Your Digital Life’ tih test zawhna (Quiz app) heading hmangin Facebook ah Mimal thil (Data) tamtak an la a. Facebook-in midang hnena a hlan chhawng leh thin. London Observer leh The New York Times-te chuan March 17 khan UK-a data firm Cambridge Analytica chuan personal information tam tak an lakhawm chu politics thila anmahni ruaitu te tana dik lo taka hmangah puh a ni.
He scandal hian mi tluklehdingawn 1.1 vel a ngawng niin BBC chuan a tarlang. TV, leh chanchinbu ah a darh ta chuai chuai mai a, Facebook ertu company ten tan an lo khawh ve bawk nen Cambridge Analytica chuan facebook chu harsatna ruamah a hnuklut tel ve ta ani ber mai. Hetih lai hian, Facebook chief Mark Zuckerberg chuan tun hnai khan an company a din a china hun kirh ber an hmachhawn mek ah hian chin fel ngal duak duak chi a ni lo mahse, chak taka hma lak a nih thu a sawi a. Khawvela thil la awm ngai lo Facebook ang han siam takah chuan kan beisei loh thil tam tak tak pawh a lo thleng thei a ni tih hi kan pawm tlan a ngai a, kan thil tih sual atangin kan insiam țha mek a, mipui pawh hian kan chungah riina an nghah chhoh zel ka beisei a ni,’ a ti bawk.
Sawi tur tam tak zingah tlem han tarlang lawk hi la. Kum 2010 Otober khan Mark Zuckerberg-a hringnun behchhan film, The Social Network chu tlangzarh a ni a, Mark Zuckerberg-a lemah Jesse Eisenberg-a a chang a, David Flincher-a'n a direct. Kum 2010 khan 'Times' magazine. Chuan 'Person of the Year'ah an thlang. Kum 2011 khan 'The Jerusalem Post', an Israeli newspaper chuan 'Most Influential Jews'.ah an thlang bawk. May 19, 2012 khan Zuckerberg leh Priscilla te hi an innei a. Kum 2015 khan fanu Max-I an nei, an chhungkuain Palo Alto ah an khawsa a ni. Dec 1, 2015 khan Mark Zuckerberg leh a nupui chuan Facebook shares atanga an dawn 90% lai chu mirethei tanpui nan an hman tur thu a puang bawk. May 25, 2017 khan Facebook founder Mark Zuckerberg a chu kum 12 liamta a a zirna thin Harvard University chuan Kum 33 chauh anihin Mark Zuckerberg chu a zirna Harvard University chuan honorary Doctor of Law degree an hlan.
Dr. Mark Zuckerberg chuan, “Kan zirthiamna hi hna hmuhna atan chauh ni lova, mahni tan chauh ni bawk hek lovin , mi dangte tan malsawmna ni thei tur “social infrastructure” kan siama mi tin tan nun awmze nei, dam chhunga tum bik nei rana an khawsak theihna tur kawng kan sialsak a pawimawh a ni. Kan khawtlang hmasawn tur chuan a ngaihtuahna thar nen a huhova thil tha ti tura hmachhawp kan neih a ngai a, thalaite hnatawh tur siamsak ringawt hi a tawk lo va, rilru puilting tak nena nun awmze hria, an dam chhan hre chiang thalai te kan chharchhuah a pawimawh a ni. Thil ropui tak kan ti tur a ni a, hmasawna chauh ni lovin, nun awmze nei, rah chhuah nun nei mihring kan chherchhuak tur a ni.” a tih hmang hian a tawp khar phawt mai ang aw.
0 Comments