CHHUNGPUIA RENTHLEI

TRAFFIC  JAM MAWLH  MAI HI               

Er. Chhungpuia Renthlei

Aizawl khawpui han thlirin  traffic jam tireh vek khawpa kawngpui han tihzauh ngaihna a awm lo hrim hrima,  tihzauh theih  pawh ni ta sela,  sorkar atanga sum leh pai tam tham tak kan dawng te anih loh chuan  kawngkama in nei ho hian  awlsam takin kan in hmun inchi khat pawh kan satthla dawn reng reng lo, kan in leh dawr  sah hek ai chuan  traffics te chu jam nileng thak mahse kan pawi ti lo. Kawngpui sira in han sawi takah chuan, thuneitu    ten an ngam zawng in ding lai, insak tur, insak mek e.t.c    huaisen taka  an thiat te, stay order an pe te leh cancel sak hial  theih lai hian Officer lian leh  politician  lian thenkhat te chuan ual au takin thenawm te zing nichhuak leh tlai nitla dawng thei lo lekin  in leh lo an din ve mek bawk a.

Lirthei leh ke akal nitinin kan pung tial tial si a, thuampui leh kulikawn inkarah chuan eng hunah pawh zing kar atanga zan thlengin   traffic a jam thei vek a ni ber mai. Bike chhuak thar  chak ber ber  pawh nei mah ila, lehpelh theih lohva kan hma a JCB emaw  Tracktor emaw a kal miau si chuan   JCB leh Tracktor speed a   muang fan raiha kan lim puat puat a tul chang a awm ta fo mai zawng anih hi.

Hetihlai hian Traffic police lamah pawh  anmahni khinglet ve theilo tur tih hriat ngawih ngawih kan mizo pui te motor ngei mai mualpho taka  traffic motora an hnuhsawn theih laiin mi thenkhat  motor kawngkama ding te hi chu  an khawih che eih ngam leh si lo.Nikum  deuh lawk khan kan sorkar chuan kawngkama motor dah khapna thu leh kawngpui kam lutuk taka workshop  neih a khap anih kha mawle. Aizawl Chhimlamah phei chuan pawisa an chawi hman hialin ka hria.  Kulikawn leh Thuampui inkar thleng an check dawn emaw tih nak alaiin   ngam loh  thiltithei leh  politician  pachal awmna veng  dawrpui leh zarkawtah an tawk ni ngei tur a ni, hman lai an chang zo leh ta. Motor dahna Garrage neih vek tur tih pawh cowboy tawhsual tawk ang maiin a reh hlen leh vang vang mai bawk si.

Dan tha tak tak kan han duanga a that leh that loh pawh hre hman mang lohva  ahan zuzi leh thin te hi chu a uihawm thin. Vehicle road tax nise  tunah sorkar chuan a duh angin min chawitir leh tho thova, hmana road tax sang lutuk tia huaisen taka sorkar beitu te kha khawnge kan awm tak? Sorkar chang lo pawh mipui thlengin a tawp thlenga thil kalpui thei kan awm meuhlo ani ber mai. Traffic ti jam zawnga NGO thenkhat  kawngzawh huaihawt kan awm thlazen bawk si te hian  thatna lam aiin harsatna a thlen chang ava tam thin em!  Traffic ti jam khawpa kawngzawh leh punkhawm hian hlawhtlingah kan in ngai anih chuan  sorkar emaw hetiang ti thin pawlho te hian mipui nunphung kan ti khaih lak tih hria ila, in enchiang teh ang u khai.

            Traffics police lam pawhin theih tawp chhuahin  zingkar atangin nileng leh zan rei tak thlengin  khawlaiah vaivut khu, meikhu, meizial khu leh motor khu an hipa, a hah pawl te hi chu an hah ngawt mai.  Traffic police  leh  nurse innei ta se, salvation Army ni ve ve bawk se, thawmhnaw var sukna sahbawn an mamawh hnem viau laiin  inchhung an luahlum lo ngawtin  ka ring. Traffics officers mithiam tak tak kan Aizawl zim te engkawl turin kan nei a, heti chunga  traffics harsatna kan tawk nitin mai te hi chu  kan inngaihtuah a ngai hle mai.  khawvel hmun hrang hrang Khawpuiah traffic jam lohna tak tak  a awm lo nachungin hetiang em em a jam tur erawh hi chu kan niin a lang lo. Parking fee kan han tisang hian traffics jam a tiziaawm miah lo bawk.

Traffics ti jam nasa ber Aizawl khawpui laili lammual Gate  bul Canteen kuala Vai Pathian In dingluah mai hi  sawi loh theih a ni lo. Kan Governnor te,  Kan CM te leh home minister  hian Central lamah  theih tawpin nawr se a duhawm ngawt mai. Sipai ram chu a ni tehmeuh mai, mahse Aizawl khawpui  thang chho zelah lirthei alo pung hluai mai si a,  kan nitin nunphung  tikhaihlak khawpa  kawngpui a hnawhchep si chuan  thiah theih loh bur a ni bik lo. Canteen kual rinawt pawh hian nasa takin traffics harsatna a sutkian theih avangin huaisen taka kan nawr chu ahun viau tawh mai. A pawimawh lai buaipui si lova a tenau zawk buaipuia   hun khawhral mai mai hi a hun tawh lo tih hriain Canteen kual  hi  Kan sorkar hian ngai pawimawh hram se a duhawm ngawt ang. India mai pawh nilo khawvel pum huapah pawh  Aizawl anga khawpui laili laia kalna dal khawpa Vai pathian in awmna hi a awm lo reng reng.

  Traffics jam chhan  heng Petrol pump, Bazar, Sumo, Bus  Station , Vehicles Parking e.t.c te hi mipui  vang a ni ber thin. Traffics police ten  theihtawp chhuahin  Bawngkawn leh kulikawn inkar main road hnaih lutukah te hian petrol pump  awm phallo se,  Sumo  chhuak tur in tawksir te hian zingkarah leh tlai lamah nasa taka harsatna a siam ve bawk avangin main road atanga hla vak lo khawpui daifem khawimaw laiah  Football ground  tia vel Vehicles counter leh station siam ta se, booking counter chu khawiah pawh awm sela,traffics jam zualpui chu  a ziaawm ngei ang. Tin, Tunhma Motor kal ngailohnaah motor a kal zel tawh mai si a, heng motor te hian a remchang lai laiah main road an rawn zawm leh bawk si thina,heng te avang hian traffic a khaih lak zing hle bawk.

Kawngpui bul hnaih lutuka petrol pump awm hian traffics nasa takin a ti jam tih kan hrereng nachungin Petrol pump awmna leh 2 wheeler workshop  te hi kan ADA leh traffic officer te hian kan ngaihthah mah mah in ka hria. Kan khawvel inher zelah tuialh thei supply hian khaihlak hun a nei zing telh telh mai si a, Tin, 2 wheelers workshop  neitu ten kawngpui kama bike an tlar chiam chiam leh duh hun huna passenger pick up leh drop avanga taxi ding thin leh inher thin  hian traffic a tizam hle thin bawk. Kawngkama motor park khap,  traffics kaldan siksawi, taxi intlanchhawk,  Road marking  e.t.c  velah hian a buai  buai  lovin, engpawh huamin  CANTEEN KUAL, JUNCTION POINT,  PETROL PUMP, KAWNGKAMA MOTOR DAH, zinphur  motor STATION siamrem  ila nunphung tibuai khawpa traffics jam kan pumpelh ang.

Tun dinhmunah chuan Sorkar pawhin  politician leh  mi hausa te nghawng phak turin ama thupek kengkawh thei lova,  Association leh mipui te pawhin kan tawrhna tur anih chuan sorkar thupek kan do zel bawka, traffics jam avanga kan tawrhna aiin traffics jam lohna tura sorkar hmalakna avanga kan tawrhna kan rilruah atla na zawk bawk si. Traffics jam tihrehna kawnga sorkar in a hmalakna a kenkawh ngam lohva mipuiin kan thlawp loh chhung chuan  traffics jam avang hian tumah indem lo ila, traffic jam te hi chu  KEIMAHNI VANG A LO NI E  tiin  traffics police zai ngaiin hmanhmawh miah lovin first gear in Kulikawn leh thuampui inkarah kar tluanin tawlh nileng zak zel ila a ni mai a lawm!

Aw le,  Traffic jam nasa lutuk tihrehna kawngah hian  sorkar  emaw Traffics police dem ngawt chi ta silo a, Heivang hian Traffics jam tuartu te hi  mipui kan nih ang bawkin Traffics jam lohna kawnga hmalak anih pawhin a tuartu chu mipui tho kan ni leh a, heivang hian sorkar, traffic police leh keini mipuite hi lungrual taka kan thawhho a tul tak zet ta.