CHHUNGPUIA RENTHLEI

MIZO THALAI  LEH SOCIAL  NETWORK    

Er. Chhungpuia Renthlei         

                  

Fur ruah tui tlak tam lai tak mai hian zankhat chu Pa pakhat  hian   ruah hi  a sur reng mai si a, tui hawk lah a luang hum hum mai si a, khawiah tak  luang zel ang maw  tiin tlaivar thulh thak khawpin  a ngaihtuah zankhua pek a!  An thenawm pain a lo hriat chuan  mawl a ti lutuk a, A tuk zanah chuan  tui luang mai mai ngaihtuaha  patling han tlai var chu,  a va han tullo tak em, hahdam taka mut mai awm tak ,thenawmpa zawng  a va han mawl mai mai tak em tiin  mut mu tuah leklo in a meng tlai var ve leh a. Tichuan,  an kawmchar pa in a lo hre ve leh a, Tui hawk luang mai mai ngaihtuaha an veng patling  pahnih  an han tlaivar chu  mawl hi a han ti laileng khawpa, beliang mun hun atangin an kawmthlang  balhla kung tar tawh tak melh reng chungin  nui tut tut  pahin Tuiluang mai mai avangin maw ka thenawm patling pahnih an tlaivar, a va han atthlak kher ve ee.. ! kei chuan tuiluang mai mai ka ngaihtuah peih loh zia hi hria se, tlaivar phei chu teuh lo lutuk, an va han a tak em.. a ti a.  Mut hmunah pawh chuan an thenawm pa pahnih tlaivar chhan   nep zia   angaihtuaha,   chutiang mai mai vanga tlaivar a tul loh zia tlaivar thakin   zu han ngaihtuah ve leh tho si a  maw le. 

A tu ber nge mawl a, a tu ber nge finglo tih hriat a har khawp mai. Bible in a sawi Khawchhak mifing pathum te thlah kal zel a mi chu an nilo phawt tih chu a chiang.   A hnuhnung pa pahnih te phei hi chuan  intifing tak chungin Mawl leh at an fawmkem a ni ber mai. Ti daih ila,  Engemaw thil thleng hlekah   chanchinbu a mi thil ziah a tulna  kan hriat loh zia  internet  leh  chanchinbu a ziak meuhva han tarlang ta mai mai kan awm ve leh nawlh nawlh bawk an ti zu nia !  Mi nunah kannun hian hmun a luah thuk ai maha thuk hian  mi nun hian kannunah hmun zu han luah thuk thin a maw le. Hei hi engdang vang ni lovin, mihring  hi mahni maia khawsa theilo kan ni, Social leh community tellova kan awm theih loh vang  a ni thei bawk ang.  Computer leh mobile khawvelah pawh mahni maia khawsak theih a nih loh avangin  awlsam taka  intlawh tawn zung zung theih nan khawvel huapzo Network  siam a ni a,  he Network zau takah hian  hian mobile leh computer hmangin  thu leh hla in hlanchhawngin  khawvel mipui te kan inkawmkhawm a,  ti ti kan sepa,  chanchinthar kan in hrilh a, se se thu di kan inhlan tawna. Hei hi  SOCIAL NETWORK  chhungkaw  kalphung  chu  a ni.

Mizoram sorkar pian hma atanga tawha vawiin thlenga tlangval  kawm nuam tak leh  tangkaina em em nei lo thiam thil ngah tak, Hmeltha  huangchhunga mahi leh mahni inrin lut ngam ngat khawpa kei ka ni inti, mahse, a  pian leh hmel han bihthuak leh chik taka belhchian pawha  Khualbuk vengtu  fapa  ni awm  tak zawk si, Mamuana ( 93 batch Block C )  in FACE TOWEL   hman nachang a han hriat meuh chuan mizo thalai tam zawk te chu Facebook khawvelah kan cheng der tawh mai  anih hi le! Ni e, FACE tih lam hawia changkanna theuh theuhah chuan  in ang lo tak  a ni.  Ni e, Thalai kalkhawmna ah tawh phawt chuan facebook, twitter, Blog e.t.c kan sawi zing malh malh hle, Mizoram  state anih hma daih tawha  ngaihzawng lama lo hmuingil  tawh leh tleirawl vanglaia  ABBA leh CCR  rimawi khawvela laichhuat lo inchhir ve nual tawh  kan rual u zawk te tan a hrilhhai thlak  lek lek khawpin kan tawngkam  a danglam a ni ber mai. Engpawh nise,  Changkan hi mihring thiltum pakhat ania mahse hnam kalphung kalpel a changkan tum erawh thil hlauhawm tak a nih avangin social network khawvelah pawh mizo takin kan nun hmang zel ila  social network kan zotawnise ( modernise !!) a ni mai.

Social network atan IT khawvela mithiam te chuan Website   an siam teuh mai a, chung zingah chuan facebook hi  Social network  lar ber  ani a, thlatin  mi  maktaduaih 55 velin an tlawh anga chhut a ni.  Social network dang te chu MySpace,Google,  Orkuts, twitter, Linkedin, yahoo e.t.c te an ni. Social network  websites te hi  tangkai zawka hman anih theih nan  sorkar pawhin a ngaipawimawh hle tawh a ni.

Thalai,  nuvalai leh  pavalai hial pawhin Social community network  kan uar chho mek zel,  thlalak dah hnem, friendlist nei hnem leh  titi vawrh hnem tak tak  nitin mai hian facebook ah leh orkut ah te kan kat nuk ta maile. Hei hian IT lama kan  changkanna meichher a chhi meuh em le tih erawh ngaituah tham tak a tling awm e. Nalh leh mawi ni a kan hriat kan thlalak hrang hrang kan Upload del dula, inkah nan leh infiam nan kan hmang zui leh a, a thenin fiamthu thawh nan thian te che chhe lai thalak kan lo dah ve mek bawk. Social Network hian khawvel pum a tuam chhuah avang hian kanfimkhur tlan erawh angai hle mai.   A chawreh leh theih tho tih vanga thlalak duk dak lo leh keimahni mualpho theihna lam thil reng reng internet , Mobile, digital camera leh computer a dah loh hrim hrim hi a him ber fo. Tunlaiah Software changkang tak tak a chhuak zela, Memory kan chawhreh tawh pawh hi awlsam tea lakchhuah theih a ni zel tawh mai si a, a bik takin Mobile ah ngat phei chuan aizawla  mobile dawr naranah pawh awlsam te a lakchhuah theih  a ni tawh tih hria ila, I fimkhur tlang teh ang u. Chawlhni leh thalai inkhawmna ah Mary leh ruthi  unaunu emaw   Mathaia  makpa hual  ang zia zanga fel hmel deuhvin tlar hma hma kan chuh leh nghala, keimahni vang hian  Pathian rawngbawltu thalai hming a hliau va, a inti neitu tu ah te kan tan phei chuan kan thalaipui min hrechiangtu ten inkhawm an chak loh phah thin  bawk tih  i hria ang u.

Aw le, Mobile leh computer lam hmangtu tam zawk te hi kristian thalai vek kan ni. Kankianga  hnamdang  milem be ho hian engtinnge min ngaih ang le ? Digital media  mobile leh computer te   hi  kan nitin khawsak awlsam zawk nan a sum leh pai senga   kan neih a ni. A bik takin Office  computer network kaltlanga  tul bik thil ni lem lo,  entertainment  leh thil ho mai mai  buaipui kan ching thin te hi balhla kunga  hawilopar thliah tum ang vel zeta sorkar computer neihchhan leh sum sen chhan nena  inhmehlo ngawih ngawih a ni.  Tin,  mimal ah pawh kanfimkhur a tul khawp mai. Aw le, Mobile leh computer lam hmangtu tam zawk te hi kristian thalai vek kanni. Kankianga  hnamdang  milem be ho hian engtinnge min ngaih ang le ? Digital media  mobile leh computer te   hi   Setana hmanrua atan kanhmang zel dawn anih chuan kei chuan hetiang milem bawlhhlawh leh a hmangtu te mobile number hi  SAKAWLH NUMBER 666 ai daihin a hlauhawm zawk ah ka ngai. Nu leh pa te u, in fate mut hilh hlanin an mobile vawikhat tal in check tawh thin em? Han check ula  hetiang lam hawi in fanu leh in fapa te computer ah emaw handset a a awm chuan  chuan fimkhur hle teh u, hetiang chhinchhiahna neite hian Lalpa ram an lut dawn si lova. 

Nu leh pa tam zawk hian  kanfate mobile kan check sak ngai lova, Internet kan fa ten an hman hian enge an tih? Zan rei tak tak thlenga internet khawvela  kan fate thil tih te hi  nu leh pa tam zawk te hian kanhriatpui mawlh silo. Kan  fanu leh  fapa te computer ah emaw handset ah te eng thu leh hla nge  awm  kan hriat loh chuan  an nun chhungril tak tak kan hrelo tihna a ni. Kan  fa te duh zawng leh rilru sukthlek zawng   hi nu leh pa te ai chuan  Computer leh mobile repair tu te hian kan hre thei mah mah awm mange ka ti. Khawvelin min herpui miau mai si a, Social network  laka in thiarfihlim ngawt hi thil tih chi anih si loh avangin a tha zawnga hmang tura kan fate kaihhruai leh   security lama nasa leh zuala tan  lak hi kan tih tur makmawh  a ni  tih i hre phawt mai teh ang u . IT bungrua te hi  khandaih hriam tawn ang maia thilti thei anih avangin  afawnga  vawna tangkai taka hman a nih loh chuan, nupa inhmel makna, ngaihzawng inthenna, chhungkaw inhauhna a thlen mai bakah   mualphona tlangah min khengbetin  zahna kawr ruam thuk takah min vawrh thla thei tih i hre reng ang u. IT hmanrua changkang  tak tak  pawh hmang ila  kan zahawmna leh  himna tichhe hial khawpa kan leklam chuan  hmasawn lam aiin hnungtawlh lam kan pan a, mite ngaihsan aiin ngaihnep kan ni thei bawk.   Hawh u,mizo thalai te hian kan phak tawk ang zelin  IT  bungrua te hi  tun aia tangkai leh hlawk zawk hian  i hmang hram hramg ang u.