CHHUNGPUIA RENTHLEI

IT  VERSUS  NLUP BAWNG                                                      

Er. Chhungpuia Renthlei

`Awle, tun tum chu  NLUP bawng leh IT chungchang ka han  bu chhuahpui ve lawk teh ang. Sorkarin NLUP a buaipui chhan ber,  EIZAWNNA nei lo mi chhumchhia ten khaw eng kan hmuha, leirem kan rah theihna tur lam hi  han ngaihtuahin  Information tehnology  pawh hian hei tho hi a tum a ni si a, NLUP bawng  leh IT hi tum thumun nei  an lo ni reng mai tiin kan thu i han thet hawng phawt mai teh ang.

Chanchinbu headline hrang hrang  thuziak ah  chuan NLUP  bawng an tla deuh  sup sup mai a,  chanchinbu  tam tam ber te chu a bu in an bu   a ni ber mai!  NLUP lamah chuan sum leh pai a bu chhuak hnem hle mai. Bawng avanga  zoram kan bu mek laiin mak tak mai chu tunlai hian lehkhabu dawr hrang hrangah Cowboy bu a lar thar ve tlat an tih pek chu maw le! NLUP bawng hmanga eizawng lo pung ta zel se la, nakin lawkah chuan mizoramah sakawr chunga chuangin  Cowboy kan la tlan lim puat puat ang tih pawh a sawi theih loh. Tun budget tharah hian mizoram budget vbc 5176.25  ah Information & Comm. Tech ah Cheng Nuaih 506.16 a ni a, nikum lam ai chuan sang ve tak chu a ni tawh nachungin  IT lama thahnemngaitute tan chuan  a beitham hle mai.

IT lama hma kan sawn theih nan, Mizoram Computer Science Engineer Association ( MICSEA) chuan  chak takin hma a la ve reng a,  Mizorama  IT magazine  mizotawngin a chhuah bawk a, mahni sumsengin sorkar a dawr ve reng bawk a ni. Hetihlai hian Cable Television leh chanchinbu hrang hrangah NLUP bawng chungchang hmuh tur a tam hle a, Kan buaipui ber NLUP bawng te lahin engmah an sawi ve silo. Sorkar lamin  an hrisel tha an ti,  mipuiin an hrisel lo kan ti bawk.,hetiang khawpa an chanchin kan sawi lai te hian engto nei hauhlovin bawng  ho lah an tla mai mai chu a ni si a. Mihring anga thusawi thei leh interview pui theih ni se, LPS pu Vana ngei mai hian lukhum sen leh T-Shirt  tial nen tawi fel tak leh  ngaihnawm takin thu han zawt deuh duah sela, Punjab leh haryana atanga  mizoram an rawn thlen dan chanchin hi a ngaihnawm ngawtin ka ring.

NLUP bawng leh IT hi mizoram mipui ten eizawnna kan neih theihna  pawimawh tak mai a nih si chuan, Kan sorkar hian vote zawnna mai mai atan nilo, mizoram mipuite eizawnna kawng tha siam sakna atuipui takzet zet anih chuan IT lam pawh hi a ngai pawimawh tur a ni ang.  Heivang hian  Mizo thalai ten Information tehnology khawvela  lei rem kan  rah ve theihna tur leh  IT  khawvel a eizawnna  ngelnghet  kan neih ve ngei theihna turin kan sorkar hian Aizawl khawpui  mai nilo, district  hrang hrangah  Information technology  post ( Programmer leh operator post ringawt nilo)  hi Department hrang hrangah siam thuai se  kan va duh em ve aw.

Mizoram sorkar leh  mipui hian  NLUP Bawng kan buaipui tluk zet hian Computer technology  hmasawnna lam hi  han buaipui ila,  kan  hlawkpui ngawt ang. Kum 2012 kan hmang mek a, hun leh ni te an liam zung zung a, Mizoramah Information technology lama hmasawnna  erawh  a kalmuang em em thung si a IT hmang tangkai tak tak tura Mizoram sorkarin Mizoram IT estated  ni tura  a beihna pawh kum 10 lai a liam leh ta..  Furpui tuilian ang maiin  thawk khat kan han khukpui hlut  thin a, kan sorkar budget leh department hotu lu te  sukthlek  atang ringawt hi chuan  satel dum dai  iangin  hmalam pan a har hle zawng a nih hi mawle.

India sorkar hmalakna azarah tunah chuan mizoramah  Certificate course atanga master degree course thleng   computer lamhawi zirna a awm ve ta. Tin, Mizoram university chuan kumin atangin  Bachelor  in Computer Science & Engineering  (BTech/BE) zirna pawh a hawng ve leh ta bawk. Heng te avang hian  kum tin Computer  zirlai kan pung chho zela, kumah  ringawt pawh hian BCA leh MCA zirlai mek mizoram ah  za tel fe kan nei a,  computer leh a kaihnawih  branch dang nen phei chuan kan thahnem ve ta hle mai. Sum tam tak senga ramchhung leh state pawna Computer  zirlai te hi kan pun mek lai hian IT lam budget ah Cheng Nuaih 506.16 chauh a ni si. Kan sorkar chak tak hian IT lamah nasa leh zuala hma a lak a tul ta hle mai.

Computer lama kan mithiam te  hnathawh tur  post nghet a tlem si, Office hrang hrangah han kal ila, Computer programmer leh computer operator  level athawk an awm nual laiin  Gazetted Officer chung lam, mizo pa in Officer motor dawng pha chin kan tih ang erawh chu  hmuh tur an vang hle. Kan sorkar hian IT Post hi siamin recruitment rules felfai tak siam thuai thuai se, departmment hrang hrangah IT section hawn belh bawk se, MPSE ah leh competitive ah IT subject  hi telh ni se, mizo thalai te kan va lawm dawn em!

NLUP bawng ringawt mai buaipuiin kan inralsai  rei ta mah mah in ka hria, keini NLUP dawng ve lotan phei chuan  a kham awm ta viau in ka hria. Sorkar in a tih tawh chu a ti tawh ni mai sela, Mizo upa in tui baw tawh hnu a a lak kir leh theih tawh loh an tih angin  NLUP avanga sum senral te chuan an  chatuan hmun an pan daih tawh sia. Hawh u, IT lama eizawnna changtlung kan neih theih nan IT hmasawnna hi  han thar thawh leh ang u hmiang.

Kan CM experience nei tha leh ram hmasawnna thinlung tak duh mi  Pu Hawla sorkar  kan nei a, tin, IT minister  chak tak kan nei bawk a,  E- Governance   lamah theih tawp chhuah zel se a va duhawm em! Eizawnna tlak  hna nghet  Group D level atanga group A thleng a departmental post hrang hrang nei thei tura   Budget  tihpun leh Recruitment rules siam hi kan state in a mamawh tawh khawp mai. IT hmasawn zel nan, Kan sorkar hian IT department  ngaihven zual zel se, IT lam hawi  recruitment rules felfai tak siam thuai thuai se, departmment hrang hrangah IT section hawn belh bawk se, MPSE ah leh competitive ah IT subject  hi telh ni se a va duhawm tawh ve aw.

Kan sorkar zahawm tak hian  E- governance lamah rilru han seng deuh sela,  IT lam hawi zirlai kan pung zel a,  chak takin  keini mizo thalai te tana  eizawnna tlak IT lamah   ngaihtuah  se a duhawm ngawt mai. Mizoram phiblic Service examna hrang hrangah  IT subject te pawh kan telh ve a hun ta khawp mai. Vawiin thlengin  MPSE examah IT paper a awm lova, achhan pawh vawiin thlenga IT subject mizoram sorkarin a la telhve lo vang mai a nie. IT hmasawnna turin   kan sorkar zahawm tak hian  recruitment rules siam tha se la, department  hrang hrangah  IT  cells changtlung tak nei turin a chak takin  hma  la se a lawmawm ngawt ang.  Engpawh nise, NLUP bawng  lo hrisel chho zel sela,MALCO bawng hnute   lo tak chho zel se,  bawnghnute tuipawlh loh dik tak leh bawngsa thianghlim tak zoram mipui ten nei thei tawh ila, IT lamah  hmasawnna thar nei zel bawk sela, kan thalai ten state dangte  angin IT lamah eizawnna thar nei zel se, a va duhawm dawn em!