Er. Chhungpuia Renthlei
Ni e,hringnun hian sana a zawnga sana rinawm ber leh mitin mil tura khuanu lo duansa a neia. He khawvela kan pianchhuah ve atangin he sana hian kan damchhung hun leh ni min chhiar saka, Milli second atangin second-ah, minute leh hour-ah,nitin Isua zirtir let hnih lai chhiar zovin nikhat kan vuiliama, Ni sarih zet chutiang zela chhiarin kar khat kan vuiliam a.Thlatin bi Isua zirtir zat zet mai kan chhiar zawh leh meuh chuan, ni leh thla te kan nguihban a, kumpui a tawpa, a linglet thawk a, kumthar a rawn inherchhuak leh thin.Hetiang reng reng hian lei miten hun leh ni kan chhiar kumhlun a ni ber mai e.
Nu pumchhunga a hranpa ngata District te reuh te thla riat dawn kan neih hnuah mahni a intodelh ve turin Independent kan sual chhuak ve hlawl mai.Harsatna leh buaina,hlawhchhamna, leh hlawhtlinna,lungngaihna leh hlimna, thihna leh damna, bawrhsawmna leh hriselna, nuihna leh tahna nena chawhpawlh zinkawng zawh turin tap chungin he lei khawharah nun bul kan tana. Engvanga nui hawk hawk chunga nun bul tanlova, tap hawm hawma nun bul tan kan nih tih chu hlim tak leh duat taka he leia kan chhungkua ni kumkhua tawh tur ten kan pian tirha min lo sawngbawl dan kan hriat loh tluk zetin hringnun sana bun hlimhlawt tan hriatfiah a theih loh a ni ber mai.
Khuanu hian hma khawsang atang khan hun leh ni ramri a lo survey fel diam diam ni ngei tur a ni, Nausen, Naupang, rawlthar, tleirawl, thalai, rual u, nu leh pa, pitar leh putar ten mahni hun ruat nei sa thlap ang maiin a hrang theuhvin kan hun kan hmang nitin a, he kan hun chanpual hi kan hman that leh that loh azirin kan nunkhua a eng in a thim bawk thin.
Kan vanglai zinkawng nuam tak han zawh ni a rawn inher a, Khamlo taka hriselna tha tak nena rual kawm tibuai khawpa rilru enghelhna neih loh na na chuan ni tlak hnu-ah pawh duh thawh takin zan hun hlimawm kan hmanga, hma tak a zan par ahan thliah a har thin ngei mai. Thalaite hringnun sana ah zan lam menrei a langa, zing mut alan tlat thin avangin thalai te zinga hma taka zing thawh thatzia khukpui chiam chiam thin nu leh pa tam ber tu leh fa te zingah zing ni chhuak lem inziahsiakna a tel ngamlo tur khawpa thangkhat liam zet mai zing nichhuak hmu ngai tawh lo kan kat nuk tho si te hi a mak hran lo ve. Thalai te Hringnun sana ah zingthawh hun a tlai mai a ni zawk.
Kum alo thara kohhran leh YMA chanchinbu kan han bih a, chanchinbu a uih ta viau emaw tih tur khawpin hla deuh hlekah kan han keng a,naupang chhia mai mai emaw kan tih te kha OB, Executive leh chanvo pawimawh tak tak chelhtu an lo ni fur mai te hi chu, Hruaitu an va naupang ta ve han tih ngawt chi ani mawlh lo. Kan hringnun sana dar zat a kal hnem deuh tihna mai a ni. Hei mai a la ni hauhlo mai le, kohhran chanchin bu kan han keuva, thenawm naupang tleirawl mai mai a kan ngaih te khan nak tip nak thaiah kohhran dan thianghlima inneih an tum thu a lo chuang kelh kulh mai zet te hi chu, naupang te te innei a han ngaih luih hram hram chi ani mawlh si lo, kan hringun sana bun in dar zat a kawk tam ve ta a ni ber mai.
Hetiang dinhmuna han din meuh tawh hi chuan BE THE RED T- Shirt ha ain, Supra pheikhawk bunin, Kawnghren hlai tawk duh dah taka hreng chungin, Second hand Chapal duh dah taka rapbet chung leh Sun Glass cheng sawmli man T shirt hmaa langsar taka awrhin , in la young tawkin City Bus ah han chuang ve mahila, Ngaiteh, chunglam atanga Mosia leh Abrahama te aw hriat ang ni hauhlo khan tlar hnung atanga aw thum det dut a, “Ka pu khawngaihin hetah rawn thu rawh, thalaiin seat an kian che anih hi” a rawn tih meuh hi chuan inthlahrunglo taka tlar hnung seat awl chuh vat mai loh chu tihtur dang a va vang awm em!
Family ration card tlar hmasa lama langsar tak maia hming a han chuan vung mai tawh hi chuan tom & jerry Cartoon en rual naupang zinga nileng lenga tawlh chi a ni tawh lo tih a chiang tih chu thluak neilo tih inhre hauhlo ka pu Tpa tak ngial pawhin a hre ngei ang le! Darthlalangah kan han in en a, kan sual em em vang bik leh BPL family kan nih vang ni hauh lova biang, hmui, khabe, zak, malpui leh dul inkar velah hair oil hnawih chi nilem lo hmul chi hrang hrang, thlawh loh chul ram ang maia a han inzam hnawk nuaih mai han hmuh chan lek phei hi chuan Nursery School dar rik kan ngaih pawimawh em em hun te kha hmanlai an chang tawh tih hairual a nilo. Hmana dumka zinga a nei te ber ang zia zanga inthlahrung em ema thian te zinga awm thin te pawh khan, Voter ID nei miah lova AMC leh MLA election-ah Vengchhung mi tlawmngai te zara inthlahrung lo taka vote kan thlak ve leh ringawt thin te hian thosilai tel miahlova christ mass kan hman hnem tawh zia a entir fiah hle mai bawk.
A hmei a pa in Keini lei mite hi Siamtu chuan he hringnun sana hi man leh mual awm hauh lovin min bun tira, He kan hringnun sana hian kan pian ni atanga he lei kan chhuahsan ni thlengin kan dam chhung hun leh ni te min chhiar saka.Kan hlim laini leh kan lungngaihni rawn inher thin mahse, he kan hringnun sana hi tlai hlauvin a hmanhmawh hran lova, hma hlauvin a muangchang chuang heklo.Tleirawl pawisa ipa tangka ang maiin kar khata ni awm te hi a ral duak duak a ni ber mai.
He lei hringnun piah lam Thlarau khawvelah chuan he kan lei hringnun sana hi Siamtu Pathian chuan min phelh sak kumkhua tawh anga, he leia kan thil tih ang zelin rorelna kan turin he hringnun sana sana kan chhia leh tha hriatna thazam ten min kaihhruai tlat avangin a minute ah leh a darkarah a buai ve lo.Hei hi hringnun sana man leh mual awmlova kan kan daikai hma chuan kan duh emaw, duhlo emaw, mitinin kan
0 Comments