CHHUNGPUIA RENTHLEI

CYBER MONDAY

Er. Chhungpuia Renthlei

Biggest Online Shopping Days of the Year tih hiala an sawi thin, US  company hrang hrang ten  sumdawnna lama an hlawkna tur leh  customer tam zawk  hipluh theihna tura  Friday  atanga  weekend chhung zawnga an bungrua te mantlawm tak taka an zawrh  avanga   a kar leh  Monday  a  internet kaltlanga  dawrtu thahnem tak an neihni hi  Cyber Monday  kan tih ber chu a ni e.Monday zawng zawng erawh cyber Monday a ni vek kherlo tih erawh hriat atul awm e.

Cyber Monday  hi  U.S. Shop organization  hnuaia Trade Association zinga pakhat , National Retail Federation ten  kum 2005  holiday session an neih atanga  an chinchhoh a ni. E-commerce  lam hawi sumdawnna kaihhnawih thil a ni ber . Mak tak mai chu   US sumdawngtu te hian ( Keini ramah pawh a ni ve maithei) Monday ah hian  a kar liam ta Monday atanga saturday  chhung zawnga  an sum leh pai hlawkna te an chhut thin a, heivang hian mi thenkhat, sorkar hna kuttling lo taka thawk, Monday  ni sakei ang hiala ngaitute te ang lo takin  Monday hi an nghakhlel em em thin.

Mihring kan changkang chho zela,  sumdawnna khawvelah internet  kan hmang nasa tial tial a,shopping lian deuh te phei chuan internet ah sumdawnna  an bun ferfur tawh mai. Keini customer tan lah a awlsam si a, mahni inlum atangin  kan mamawh  enthlithlaiin shopping website hrang hrang kan fangkual zung zung thei tawha ni.

Keini mizoramah chuan  Office thil avang leh hnathawhna hrang hrang avanga  weekday a bazar kal hmanlo  te hian dan tlangpuiin  Weekend  hi bazar kal nan kan hmang tlangpui a, kan  mamawh kan lei nghal pawp pawp thin. Hetihlai hian  office ban hun dar 4 leh dar 5 anih laiin  chhun pachang leh chawhnu herah    office kal lai  bazara  hmuh tur an awm sup sup ang lawi a.

Ram changkang zawk ten  lawmthusawina ni( thanksgiving day )  weekend a an han hman  meuh hi chuan  customer  nasa tak an hiplut a,  customer te chuan internet kaltlangin  dawr hrang hrang an browse kual a, an duhzawng ang ang internet kaltlangin  a lehpek  Monday ah an lei teuh thin. Cyber Monday ah hian  internet kaltlanga sumdawngtu ten  78% lai maia an sumdawnnaah hlawkna an hmuh thin vang a ni tiin Scott Silverman, the head of Shop.org chuan a sawi. Sumdawngtu ten Cyber Monday  ti a an vuah pawh hi an tifuh hle mai.

Cyber Monday  hi  United Kingdom, Germany, Portugal  leh France ramah te pawh an hmang uar hle bawk. Abik takin UKonline retailer te chuan  US ang maiin Cyber Monday hi kum khata  internet kaltlanga sumdawnna lian ber ni (the busiest internet shopping day of the year ) ah an hmang a ni. Awle, Cyber Monday website hi shop.org te chuan official takin an enkawl a ni. USinternet market chanchin chuan Franceram a chiah hneh hle a ni ang kum 2008 khan  Franceramah  Cyber Monday an hmang tan ve leh ta. Portugalchuan kum 2009 khan  Cyber Monday hi an hmanga. Kum 2010 khan Germany chuan  Cyber Monday an hmang ve leh bawk.Tin, kum 2010,november thla atanga khan  New Zealand Online retailer te chuan Cyber Monday Sale an hmang veleh ta bawk.

Keini mizoram kristian ramah erawh chuan mahni tana chakai  khawrh mai pawh duh tawk lovin, kan chhungkhat leh laina hnai te tan thlengin kaikuang leh sangha zawng zawng mai bakah chengkawl tlengin kansumbawmah kanhiplut fai vek mai zawng anih hi. Mizoramah erawh chuan  kansumdawngtu te hian  cyber monday hi kan la neilo mai pawh nilovin a awm ani tih pawh hrelo  vuakthluk sen loha tam kan la awm ngeiin a lang. Lehkhathiam te hian sumdawnna tuipuiah kan thiamna te nen hleuh kual tak tak ila, vai leh sap ho ten sumdawnna tuipui mawng a mi thil hlu tak an lakchhuah theih ang hi kan la chhuak ve thei lutuk ang tih hi ka ring tlat a ni. Lehkhathiam lo ai chuan lehkhathiam taima taka sumdawngtu chu a hlawhtlinna a sang zawk ngei ang.

Kum 2011 kanchuankai meuh chuan Mi thahnem ngaite thawhrimna azarah internet kaltlanga sumdawnna pawh mizoram ngeiah a awm ve tan ta. E- commerce lama hmasawnna ropui tak nei turin kan sumdawngtu te hian internet hmanga bungraw zawrh hi  uar thar zel ila a duhawm hle mai. Sumdawnna khawvelah hian ram changkang zawkte chuan internet an hmang nasa em em a, keini mizoramah pawh nu leh pa valai deuh leh thalai te hian  tun aia nasa in internet hi hmang ila, games leh entertainment atan ringawta mahni fate tana computer lei thin te hian computer hi chhungkaw bungraw pawimawhah hmang thei dawn si a. petrol man a to zel, traffic a jam nasa telh telh mai si, bungraw tlemte lei tur pawhin chawhma dawn hun kan khawhral a ngai ta hial mai nen, mahni inlum atanga bazar theih hun a nghahhleh awm ta hle mai.

Engle khawle, sumdawnna khawvelah mizoram in hma a sawn zel anga, kan sorkar lam pawhin  mipuite rawngbawl tura thlan kan nihna ataka lan tirin zirlai lehkha thiam  sorkar hna hmu ve lo ten  eizawnna  rualrem an neiha, khaw eng an hmuh ve ngei nan E- commerce lam hawi  project  tha tak duang se la, Cyber Monday hi eng ni ah emaw chuan kan ramah ngei kan la hmang ve turah ngai phawt mai teh ang