CHHUNGPUIA RENTHLEI

 MOBILE COMMUNICATION   LEH KAN THALAITE  

-Er. Chhungpuia Renthlei   

            Hmm., thusawi leh ziah  nikhua apianga  thuhmahruai neih  zel mai hi   ei lehin dawn apianga tawngtai zel tum  leh insual dawn apianga  exercise leh kungfu han practice  hmasak leh te te tum nen hian a in ang deuh roh va,  a tangkai viau rualin kawng leh lamah chuan  a remchang vek kher lo thin.Tin,  thusawi leh ziak thiam ten  tunlaiah chuan an ching meuh ta lo bawk nen,  keipawh  thusawi leh ziak thiam ka nih vang ni hauhlovin  thuhma han nei duah tur khawpa thu leh hla lama ka ralkhat puzawn Pu KL Liana leh  Pu Vanneihtluanga te anga tawngkam thiam ka nih ve loh avang zawkin  thuhmahruai tel miah lovin pa valai nupui nei thar hlim zan mu tur ang maiin ka thupui MOBILE COMMUNICATION   ah ka han bung  nghal mawlh mawlh mai  ang e!  

            Ram leh hnam hmasawnna  lehkhabu kawmchhah leh ropui    phek hmasa lam   langsar leh  mite ngaihven lai ber hmun luah tlat thintu, kan thalai sang tam tak  min ti nui a min vel tap thin tu MOBILE  COMMUNICATION   hi   ram changkang  zawk te chuan  invuakhlum nan ni lovin ,  tunhma kum sawm liam ta atang daih tawh khan  hna pawimawh  tin reng thawh nan an lo chelek  nasa hle tawh mai. A tangkai zawng lahin kan hmang tangkai na ngiang  mai  tih chu  kawr chung dum leh necktie nena inthuam kher lo pawhin  piangthar hlim Pathian thu sawi chen zeta a rei sawi tur kan nei ngei ang le.

Thalai  inkawmkhawm leh puipunnaah   hmelhriat thar han tawn chan pawhin Enge i Mobile number ?  tih hi  kan  tawngkam hmasa a ni ber fo. Rual pawl nan Mobile neih kan chak a, kan han neih meuh chuan thian te pawh kawmtha  hman lek lo khawpin mobile kan khal leh lawi si te hi " A makin  a na " tih pawh awl tak a ni awm e.  Mobile company ho lahin  kan khawsak mil tawk ang zela  handset leh a behbawm  hmarua an siamchhuah,   phung zinga piring vawrh ang mai a an hralh zo   nghal  duak duak zel mai te  hi thil mak a ni lem lo e.  Tunlai thil awmzia kan hriat avang leh muhil thawh harh a hun tak zet tawh avang te pawh a ni ang Top up thunna nei mumal lo te pawhin second hand Mobile handset kan zawng ruai hlawm bawk nen,  Mobile hian  lehkhabu ah chauh nilovin mipui  thinlungah  pawh  hmun ril ber ber a luah tih chawlhni tuka sa hmeh ziah pha ve te tan pawh hriat thiam loh rual a ni ta  lo.

            Hetihlai hian   Pathian hming aia  Mobile hming  kan rama a ri zing  lutuk ta hian  Setana  tan kawng zau tak  a hawng ve mek  bawk a ni tih kan hriat  a tul hle awm e. Khawvelah Mobile phone a maktaduai tel meuh an hralhchhuak tawh nachungin  Mizoram anga invuakhlum nana hmang erawh chu sawi tur a awm lem lo niin alang. Handset man to tak tak siam chhuah zingah  mihring nunna hial lakna tur khawpa man to u chuak awm theiin ka ring lo.  Technology hmasawnna in a hrinchhuah hmanraw tangkai tak tak zinga thil tha tih nana hman  awlsam tak leh   thil sual hrang hrang tih nan pawha remchang tak mai Mobile hi  a hman a awlsamin  a hahdam  lawr lak tih chu  Zawlnei Isaia lehkhabuah hrilh lawk ni ve  kher lo mahse, a takin  kan hmuin kan hre mek zawng anih hi. Piangthar hlek lo, Pathian theihnghilh thak khawpa kohhran  rawngbawlna ruih chilh bur mai  rawngbawltu veng tinah an  pung thur thur ang mai hian, Mobile mamawh hlek lo leh Mobile Communication   tum bulpui ber  theihnghilh thak khawpa  Mobile  tuipui  em em thalai kan lo pung chak lutuk hian  Officers  leh BPL Chhungkua thlengin harsatna namen lo arawn thlen ta a ni.   

            Sum leh pai hailuhna hmanrua leh awlsam zawka hnathawh nana chhungkaw thenkhatin kan tangkaipui hle laiin  thenkhat tan erawh chuan tul hauh lova sum khawhralna leh hnathawk hleithei lova min awm tirtu,  tah leh ha thialna, lungngaihna chirhdum a min hruailuttu hmelma lian ber a ni ve mek bawk. Thalai inthlahdahna inchhungah phei chuan,  Mi hausa nupa tar lam fa chuam pangchan hunlai ang maiin Mobile  hian chhungkaw tana hlawkpuina thlen silovin nitin zan tin sum leh pai min laksaka. TOP UP leh RECHARGE te hian Mautam sazu chimawm vanglai tluk zetin chhungkaw pawisa ip a ei pawp zau tial tiala, nitin zantin kan sum leh pai a tham chhuak  mawlh mawlh tawh mai zawng anih hi.Tin, heti hi a ni a ngaiteh,  Mizo thalai tunhma a nitin zantina chempui leh favah hum a Zak kau meuhva  ban phara hnathawk thin te khan new millenium kan han chuankai meuh chuan  SONY, MOTOROLA, SAMSUNG e.t.c handset  chhuak thar ber ber chi thatchhe tak leh zawi tawkin beng bulah kan hum fur ta mai.

Ka sawi zel dawn e, Hindi leh vai tawng chawhpawlh nuaih thei khawpa intichangkang, Program an ngah lutuk avanga hun awl an neih loh thu  eichawp dawra  sawi chawhma thak thak thei te, Balance nei miah lova nileng lenga Mobile khal peih hoten nei nung fa ang hrima " DUAL SIM ngat lo chu " kan han ti a, pawimawh thilah inbiak ngai se " Balance ka nei lo va, min rawn phone mai teh " kan han ti thla zen leh nghal te hi zawng..  Chawlhni chawhma inkhawm ban vanglaia Lamlian kawng sira lo ek tluk zeta zahthlak niin  ka hria. Mizo  mipa hovin underpent hak kan intihhmuh hunlai leh hmeichhia ten secondhand bra hren an uar hun vanglai tluk zeta mobile kan han intihhmuh hi chu Bible in " Mihring hi enge anih a,i hriatreng le?" a tih ang deuhvin " Mobile hi engemaw anih a kan thalai ten heti em em a kan han hriat chu le ? " tih mai awl tak a ni.

Neih zawng zawng  sengin Mobile second hand ngei mai kha,  Original handset leia lei  turin inthlahrung takin kan kal a, rei ngial tlawm kan in dawn hnuah cheng za thum vel  thla thar leh hmasa bera  pe tura intiamin, a man pawh pe kim lo nuaihin  kan  lei thei hram a, Phur takin  Bus hlui lampang seat hnung ber tukverh bulah thuin haw kawngtluanin Mobile kan khala, Bus atanga kan chhuk dawn meuh chuan Mobile nei ve lo kan han hmuhniam tan nghal pang thei zu nia!. Hei mai a la ni lo, Mobile nei thang tawh awm ang fahranin Mobile loud speaker ah kan han dah a, Balance cheng sawm vel lek neiin tul miah lovah hmel hriat kan han bia a, mizo tawng bak tawng dang thiam miah silovin mizo tawng kan han lam pai leh nghal te hi zawng  a lutuk mah mah in ka hria. Tlaivar thulh thak khawpa zankhua a mutmu tuah lova indawmkun ngawih ngawihna tham hiala zahthlak a ni.     

            Kum sangbi thar kan han chuan kai meuh chuan  thalairualin  kan ngaisangin   mawza tellova pheikhawk  bun chunga  chawlhni zan  inkhawm aiin Mobile tellova khawlailen kan zak tawh  zawk ti ila  dawt sawi avanga  VDP vuak tawrh leh Jail tang  register bua ka hming a chuan ka ring lo. Keini misual min chhandam tura kan Lal Isua in lunghahna hmun a neih loh lai leh  tantu nei hauh lova sira hnawl a nih laiin,  chhungkaw tam zawk chawk buaitu leh zoram economics tichhe hial thei MOBILE ve thung chuan   kum sangbi thara  kan khawvel khawvel eng a rawn hmuh ve atang rengin,  zawlnei te hrilhlawk ngai miah lovin  mi zawng zawng lawm a hlawhin naupangin an lawm, thalaiin an ngaisang, puitlingin an ngai hluin mut mawh hnar mawhah kan nei a ni  ber  mai.  Keini mizoramah pawh mitin tana chanchin tha  kengtu ang zia zanga zu leh sa hmun tanga  pastor  khumlaizawl thleng pawha thlenin hnawng ngai hauhlo  Mobile  hi    zofa thalai lenrual mai pawh nilo,  Zoram vanhnuai he lei china cheng nu leh pa   zingah pawh puan ang han hnawl phal kan awm mawlh si lo.

Ni e, tiraw, Mobile hi thenkhatin an hlawkpui viau laiin thenkhatin an chhiatpui ang lawi a, Damlo thenkhat ten damna an chan phah laiin, Dam tha lai leh la dam zel tura beisei thalai thenkhat ten an  nunna hial  an chan phah bawk a. Romantic khawvelah meuh pawh thalai tam zawk ten  hmangaihna  hrui thlunzawm nan an hman mek laiin Nupa in kawp remsa inzawmna hial  chhem then phawk phawk khawpa  na in  hmun thenkhatah chuan Mobile thlipuii hi a tleh ve mek bawk a. Ngai teh, Mobile handset Camera tha mi kan han neih meuh chuan,Ringtu he luikama thu ten a then pawh kan hriat loh tur leh kan hmuh loh tur mi pat hmeichhiatna lam thleng thleng he luikam atangin  nitin kan  hmu in kan hria ni berin a lang ta.Kei zawng sawi thiam a harin sawi lova ngawih bopui thiam lah a har  thin mang teh e ka ti ! 

 

            Aw le, famkim lohna khawvela kan chen chhung hi chuan   technology  khawvelin a rawn  hrinchhuah MOBILE COMMUNICATION  hi  a hmangtu a zir a tha leh tha lo mai a ni tih keini thalai te hian hrereng fo ang u.Mobile kan neih ve loh avangin hniam ta luaah in ngai lo ila,  Tin, kan neih avangin changkang ta lua ah in ngai bawk heklo ang u.Mobile quality nilovin, Mobile a kan thuthawn te, kan thusawite leh kan biak te kha kan identity tilang chiangtu a ni zawk. Kan khawvel hmasawn zelah tunhma aiin kan nitin eizawnna a lo danglam a, Zing, chhun leh zanah  hmun hrang hrangah eizawnna hna thawkin kan kalchhuak nitin tawh mai si a,  zing leh tlai apianga dar insi khupa chaw ei dawhkan kil ho a, a ruala chaw bar  dual dual  phei chu chhungkaw changkang lo ah kan ngai lek lek zawk tawh. Hei vang hian   kan nitin mamawh phuhruk nan kan phutawk MOBILE te chu nei vek thei ila kan nitin khawsak a awlsam phah ngei ang tih chu kan hre thei vek awm e.

Kut hlei vang leh  in lak changkan nan mai mai  a na zawngin chelek sek lo ila, a pawimawh hunah erawh chuan  inthlahrung miah lovin kan neih ang chhun chhun zahpui hlek lovin lek chhuak ngam ila. kan Lal Isua nghawngkawl,  “phur rik chhawk zang thei khawpa Nghawngkawl bah nuam “ ang maiin chhungkua, nu leh pa phurit chhawk thei turin nghawngkawl mawl mang tak leh bah nuam takah keini mizo thalai te hian  MOBILE hi kan siam thei ngeiin ka ring tlat a ni.