CHHUNGPUIA RENTHLEI

CHAPCHAR KUT                                     
-Chhungpuia  Renthlei  
 

 Chapchar Kut hi Mizo Traditional kut dik tak  a ni. Hman atanga vawiin thlengin  Chapchar kût hian  keini  mizo te ngaihhlut a hlawh hle a ni. Mizo kût zinga uar ber leh hman hun chhung rei ber a ni.  Mizo ten kan pi leh pu te chin dan leh zia kan phochhuah theihna hun remchang ber a nih bawk avangin  a hman danah pawh hian kan pi pu te kha an fimkhur  hle. Hetih lai  hian  hun lo inherliam zel chuan chapchar kut kan hman dàn pawh chu a rawn her danglam chhohpui ve hret hret zel.

 Kum 1974 a lo inher meuh chuan Art & Culture Department hial te kan sorkarah a lo piang a, kum 1981 atang khan   Chapchar kût  hi kum khat chhunga ‘tihtur’ pawimawhte zingah a dah a ni. State Level Committee  hial a din bawk. Kum 1981 aṭanga kumin thleng hian Mizoramah chuan March thlaah lawm ziah a ni. Mizoram chauh ni lovin, India ram chhunga mizo awmna  leh   India ram pawna Mizote awm tamna  hmun dangah te pawh Chapchar Kût hi hman ṭhin a ni bawk.

 Chapchar kut hi Mizo pipu te nundan leh chin dan hrang hrang te leh hmanlai hun tarlang thei zawnga thangthar leh kan naupang zawkte hrilh hriatna hunah hman tur a nih avangin a theih chen chena Mizo thei ang bera  hman ni zel se , kan pi leh pute hunlai a an hman dan ang khan hmang Mizo takin ila  mipui nawlpui rilruah he Kut hi a hlu zual sauh ang a, hnam dang  mi tan pawh en chakawm tak a ni ngei ang.

 Chapchar kut tunlaia kan hman dan erawh hi chuan duhthu a sam meuh tawh lo niin alang ta. Tunlaia Chapchar kut kan hman dan tam zawk hi chuan kan Mizo Society leh Culture  rapbet ta lek lek niin a hriat. Kan duh ang zawng zawngin kan  kan her danglam a, hmanlai anga lantir tum si, intih changkang tum bawk siin kan hmang a. Chapchar kut hlu tak mai hi tunlai changkanna tuipui a a pilbo hma  ngei hian Mizo te hi harh chhuak ila, Chapchar Kut hi enge ni a, engvangin nge kan hman thin? tih hi thangthar ten awlsam leh chiang taka an hriat theih nana document siamsak hi Chapchar Kut kan hman chhan ber ni thei se a duhawm hle mai.

  Chapchar kut  kut hlu tak mai hi  tih changkan vak emaw chi a ni lo a, zaithiam lar te an zai leh zai loh avanga  hlawhtling leh hlawh-tling lova teh ngawt chi a ni hek lo. Isua nen Chapchar Kut  ti thin mah ila, hunserh hman lai bak kan Lalpa tan  hun leh  hmun kan pe  chuang lo bawka, Pathian thu nena kaihpawlh phet tum a tul lo bawk.Mizo nih tihnuamtu,  Mizo Traditional kut dik tak leh  Mizo tena kan kut neih hlut ber, Mizo ten kan pi leh pu te chin dan leh zia kan phochhuah theihna hun remchang ber  ni bawk,  vawiin  thlenga   inkungkaihna tha zawk kan neih theih nan te  a kan la hman chhunzawm,  kan mizo Kut ropui ber Chapchar Kut hi enge ni a, engvangin nge kan hman thin? tih hi thangthar ten awlsam leh chiang taka an hriat theih nana document siamsak hi Chapchar Kut kan hman chhan ber ni thei se a duhawm hle.  Chutianga Mizo taka he kut hi kan hmang anih ngat chuan a hmuna thlir peih kan tam lem lo pawh a ni thei, mahse ramdang khualzin (Foreign Tourist) erawh kan hip phah ang a,   media hmanga vawrhdarh  tlak, khawvel   mipui  entir tlak a ni ngei ang. Kan hnam ziarang tam tak tivul zelin Chanchintha nen inmawiin Chapchar Kut  kan hman zel a va pawimawh em !