CHHUNGPUIA RENTHLEI

BEISEINA THAR NEN KUMTHAR  
Er.Chhungpuia Renthlei

Kum 2017  kumhlui  chuan koh kir theih rual loh vin  kan tihthat te, kan tihsual te, kan hlimni te, kan lungngaihni te, kan bawrhsawm ni te, zawng zawng nen  chatuan atan a her liam leh ta. Hetih lai hian, kan thiltih thenkhat te  chuan lunglenna leh inchhirnaah te, lawmna leh tahnaah te min hnuh luh an tum ngei bawk ang. Eng pawh nise, he kumthar hmu hman lova mi tam takin mual an liam laia kumhlui thlahliam thei leh kumthar lawm thei a kan awm hian  damlai kan ni tih a entir mai bakah, hmabak beiseina nei turin hun kan la nei tihna a nia. Vanneihna a chhiar  nachang hre tan chuan a man a va sang em!

Khuanu zara fam ta lo na na na chu, kum 2018  kum thar chuan kan  la zawh ngai loh leh tawn ngai reng reng loh hun thar leh thil thar kan paltlang tur  kan hmaah a rawn pharh leh ta duai mai le. He hun thar tuma la zawh ngai loh hi kum tawp thleng  dam tlang takin kan thleng kim ang em le?  He kum thar kawng kan zawh tur hi he khawvel mihring leh thil siam tumahin minute khat pawh an la rah lawk bik loh, khawvel miten a ruala kan rah tur a ni. Kan hriat loh lam tanga harsatna lo thleng thin te hi chu thuhran nise, mahni kawng theuh kan zawh turah midangte harsatna thlentu nilovin, fimkhur takin  inbuatsaih ila, kan inchhir zui lehna tur ti lo turin chunglam roreltu leh leilam roreltute duh dan in ke i pen theuh ang u.

Kum bul atang hian  taksa, rilru leh thlarau inbuatsaih ila, ruahmanna duhawm leh beiseina thar  nei theuh ila, heng  kan inbuatsaihna leh ruahmanna te, beiseina nung te hi  kum bul atanga kum tawp thlenga chakna leh hlawhtlinna pe theitu tur an ni ngei ang le. Hawh u, BEISEINA THAR NEN KUMTHAR  hma lam hun   duhawm  hi thlir tlatin kan  zin kawng   i zawh theuh ang u.

 ( Written  on dated 3rd, January 2018 11:30 AM )